Umutoza wa Liverpool FC, Jürgen Klopp, yavuze imyato Sadio Mané w’ikipe y’igihugu ya Senegal na Mohamed Salah wa Misiri barahurira mu mukino wa nyuma wa CAN kuri uyu wa 6 Gashyantare 2022.
Nubwo kugeza ubu ikipe ya Senegal itaratwara na rimwe iki gikombe, Sadio Mané yagaragaje ko ubu ari cyo anyotewe kurusha UEFA Champions League na Premier League, ku bw’igihugu cye.
Mané ufite imyaka 29 ni umwe mu bakinnyi bitwaye neza kuva yagera muri iyi kipe ya Liverpool akinira, akaba n’umukinnyi ngenderwaho kuri Jurgen Klop utoza iyi kipe, kuko mu myaka itanu n’igice amaze muri iyi kipe amaze kuyitsindira ibitego 107.
Umutoza Klopp yaramukeje nk’umukinnyi mwiza, gusa ntiyigeze amwita umukinnyi wa mbere ku Isi, nk’uko yabigenje kuri mugenzi we Mohamed Salah.
Yagize ati: “Abo bahungu bombi ni indwanyi za nyazo, buri gihe baba biteguye bihoraho. Ubwo batsindiraga inkweto ya zahabu hamwe byari agahebuzo. Ubu bari kumwe n’ibihugu byabo, bafite akazi nk’abakinnyi b’ingenzi cyane bari kuyobora kandi babikoze neza.”
Aba bakinnyi ni bo ba kapiteni b’ibihugu byabo. Umukino ubahuza uteganyijwe kuba guhera saa tatu z’ijoro ku isaha yo mu Rwanda.
