Me. Emmanuel Altit uhagarariye itsinda ry’abanyamategeko bunganira umunyemari Kabuga Félicien yatangaje ko batanze ubusabe bw’uko Kabuga yaburanishirizwa i Hague aho kuba i Arusha nk’uko urukiko rusesa imanza rwa Paris rwabitegetse.
Kuwa 30 Nzeri 2020 ni bwo urukiko rusesa imanza mu Bufaransa rwatangaje ko Kabuga Félicien agomba kuburanishwa n’urwego rwasigariyeho urukiko Mpuzamahanga Mpanabyaha Rwashyiriweho u Rwanda (IRMCT). Ni icyemezo cyakiriwe neza n’Abarokotse Jenoside yakorewe Abatutsi.
Kuri uyu wa Kane uwunganira Kabuga mu mategeko Emmanuel Altit yabwiye BBC ko bamaze gutanga ubusabe busaba ko Kabuga yaburinishwa n’urukiko mpuzamahanga mpanabyaha rw’i Hague mu Buholandi.
Icyemezo cy’urukiko Rusesa Imanza mu Bufaransa nta handi kijuririrwa, bivuze ko ibyo rwemeje biba bigomba gushyirwa mu bikorwa nta kabuza.
Emmanuel Altit yagize ati: “Tugiye kugaragaza ko igihe yakoherezwa Arusha uburenganzira bwe bwaba bubangamiwe bikomeye ,tugiye gutanga ubusabe tuvuga ko byaba byiza ku burenganzira bwe ko yakoherezwa i Hague mu Buholandi”.
Umuyobozi mu muryango, IBUKA Freddy Mutanguha avuga ko Kohereza Kabuga kuburanira i Arusha ari inkuru nziza ku barokotse jenoside.
Mu kwezi kwa gatanu, IBUKA yandikiye ruriya rwego rw’i Arusha n’akanama gashinzwe umutekano ka ONU, isaba ko Kabuga nashyikirizwa urwo rwego yazahita yoherezwa mu Rwanda.
