Kenya: Leta yakoresheje imbaraga z’umurengera ngo abaturage bagume mu rugo

Bamwe mu baturage bo muri Kenya,mu mujyi wa Mombasa bahuye n’uruva gusenya ubwo bageragezaga kurira ubwato ngo bafate urugendo kandi itegeko rya Perezida Uhuru Kenyatta ryarabibujije mu rwego rwo kwirinda Coronavirus.

Aba baturage batewe ibyotsi biryana mu maso ndetse baranakubitwa bikomeye ibintu byaviriyemo abarenga 12 gukomereka.

Imiryango iharanira uburenganzira bw’ikiremwamuntu muri Kenya,igeze kuri 20 yose yahurije ku kwamagana ibikorwa bya kinyamaswa aba bapolisi bagaragaje kuko uretse n’ibi hari umupolisi mukuru yahohoteye umunyamakuru atari mu kazi ndetse atanambaye impuzankano ya polisi.

Mu nyandiko isaba Polisi y’igihugu cya Kenya gukosora no guha umurongo abapolisi bacyo,hibazwaga impamvu ubu buryo bw’ibyo biryana ari bwo bwakoreshejwe kandi butera benshi kuba baruka,gukorora,gucira ndetse no kwikorakora mu maso bya hato na hato ibintu bitandukanye cyane n’uburyo buzwi bwo kwirinda Covid-19.

Urubuga worldometer rugaragaza ko Kenya ibarura abarwayi ba virusi ya Covid-19 bageze kuri 38 naho umuntu umwe muri iki gihugu yamaze kumwivugana gusa Leta ikomeje gukaza ingamba kugira ngo iki cyorezo kidakomeza kwiyongera.