Nibura abarwanyi 15 ba Mobondo n’abasirikare batanu bo mu Ngabo za Repubulika ya Demokarasi ya Congo (FARDC) baguye mu mirwano iherutse kubera i Kikwit, mu Ntara ya Kwilu.
Kuwa Mbere, itariki ya 29 Ukuboza, igisirikare cyeretse abanyamakuru intwaro n’inyandiko by’abarwanyi ba Mobondo byafashwe.
Nk’uko FARDC ibitangaza, ibintu byafashwe birimo imbunda 29 za calibre 12, imbunda esheshatu za AK-47, hamwe n’ibyangombwa byinshi, byafatiwe mu bikorwa byakorewe mu midugudu ya Bolingo na Nkana, i Kikwit.
Umuvugizi wa FARDC muri ako karere, Captain Antony Mualushay, yongeye gushimangira ko ingabo ziyemeje guhagarika burundu uyu mutwe ugaragazwa nk’ikibazo gikomeye mu marembo ya Kinshasa.
Yababajwe n’urupfu rw’abasirikare batanu, avuga ko batishwe n’ibyuma ahubwo ko bicishijwe intwaro z’intambara. Ku bwe, ibyo ni ibimenyetso byerekana ko uyu atari umutwe w’ibyigomeke cyangwa inyeshyamba zoroheje, ahubwo ko ari “inyeshyamba zifite uko zubatswe”.
