Gavana wa Jimbo la Kivu Kaskazini, ambaye kwa sasa anafanya kazi uhamishoni huko Beni (DRC), Jenerali Mkuu Évariste Somo Kakule, amekutana na wajumbe kutoka Umoja wa Ulaya (EU) kujadili hali ya usalama katika eneo hilo.
Katika kikao kilichowakutanisha viongozi wa ndani, raia na wajumbe wa EU, Gavana Kakule alisema hali ya usalama Kivu Kaskazini ni mbaya. Alisema maeneo yote ya jimbo hilo yameathiriwa na ukosefu wa usalama; maeneo matano yako mikononi mwa waasi wa M23, huku mengine mawili yakiwa na matukio ya ugaidi.
Alieleza kuwa vita vimesababisha uharibifu mkubwa wa miundombinu, kushuka kwa uchumi, miradi ya maendeleo kusimama, vifo vya watu wengi na maelfu kuyakimbia makazi yao.
Pia alielezea wasiwasi wake kwa wajumbe wa EU kuhusu Warwanda wengi wanaohamishwa kwa makusudi hadi maeneo yanayodhibitiwa na M23, akisema hilo ni tishio kubwa kwa mamlaka ya serikali ya Kongo.
Alionya kuwa vitendo hivyo vinakiuka haki za raia wa Kongo na vinaweza kubadili muundo wa idadi ya watu (demografia) katika maeneo yaliyotekwa.
Balozi wa Umoja wa Ulaya, Nicolas Berlanga, alisisitiza kuwa EU inaunga mkono uhuru na mamlaka ya DRC, na itaendelea kutoa misaada ya kiusalama, kibinadamu na ya maendeleo. Aliongeza kuwa misaada ya kibinadamu itaongezwa katika maeneo ambayo bado hayajafikiwa.
Berlanga pia alizungumzia changamoto za kufungwa kwa uwanja wa ndege wa Goma tangu kuchukuliwa na M23 mwishoni mwa Januari 2025, hali iliyozuia misaada kufika, upungufu wa dawa, kubomolewa kwa kambi za wakimbizi na uporaji wa vifaa vya misaada.
Gavana Kakule alisema kuwa kuhamishia makao makuu ya jimbo Beni kumewapa matumaini wananchi, na ukarabati wa uwanja wa ndege wa Mavivi umeanza.
Jenerali Mkuu Kakule alisisitiza kuwa ataendelea kurejesha amani jimboni humo, kwa kipaumbele katika programu za kuwaunganisha upya wapiganaji wa zamani katika maisha ya kiraia.
