Ikipe y’Igihugu ya Libya yatsinze Amavubi y’u Rwanda igitego 1-0, bituma icyizere cyayo cyo kujya mu gikombe cya Afurika gisigarira mu mibare.
Amavubi yari yakiriye Libya kuri Stade Amahoro, mu mukino wa gatanu wo mu tsinda D w’ijonjora ryo gushaka itike y’Igikombe cya Afurika cya 2025 kizabera muri Maroc.
Ni umukino umutoza Torsten Fran Spittler n’abasore be basabwaga gutsinda, ibyagombaga gutuma amahirwe yo kujya muri Maroc yiyongera.
Mu gice cya mbere cy’umukino abakinnyi barimo Samuel Guelette, Nshuti Innocent na Mutsinzi Ange Jimmy babonye uburyo bwashoboraga kuvamo amahirwe y’ibitego, gusa habura uwanyeganyeza inshundura.
Ni igice cyarangiye amakipe yombi anganya 0-0.
Igice cya kabiri cy’umukino cyaranzwe n’igitutu cyinshi ku ruhande rw’Amavubi y’u Rwanda, gusa kubyaza umusaruro uburyo bwagiye buboneka birananirana.
Abakinnyi barimo Kevin Muhire Kevin winjiye mu kibuga asimbura Samuel Guelette na Manzi Thierry babonye uburyo buremereye bwashoboraga kuvamo igitego, gusa amahirwe babonye bayatera inyoni.
Libya itaremye uburyo bwinshi bw’ibitego imbere y’izamu ry’Amavubi yafunguye amazamu ku munota wa 84 w’umukino biciye Faid Mohamed.
Uburyo bw’igitego bwashoboraga kugarura Amavubi mu mukino bwabonetse ku munota wa 88 ubwo Dushimimana Olivier ‘Muzungu’ yateraga n’umutwe umupira wari uturutse muri koruneri, gusa biba ngombwa ko Libya itabarwa n’umunyezamu Murad Al Woheshi.
Gutsindwa Libya byatumye u Rwanda ruguma ku mwanya wa gatatu mu tsinda D n’amanota atanu.
Iyi kipe kuba yajya muri Maroc birasaba ko BĂ©nin iyiri imbere yatsindwa imikino ifitanye na Nigeria cyo kimwe na Libya, na yo igakora ibitangaza byo kujya gutsindira Nigeria bazahurira mu mukino wa nyuma wo mu itsinda iwayo.
