Umwavoka wa Lt Col Jean Pierre Nsekanabo uzwi nka Abega wari ushinzwe iperereza mu mutwe wa FDLR, Elias Habimfura yabwiye urukiko ko umukiriya we akwiriye gufatwa nka Gen. Paul Rwarakabije wigeze kuyobora FDLR nyuma agataha, agahabwa umwanya muri RDF ndetse na RCS. Ni mu iburanishwa ryo kuri uyu wa 10 Ukuboza 2020 mu rubanza Abega areganwa na Ignace Nkaka wari umuvugizi wa FDLR. Habimfura yabwiye urukiko ko Lt Col Nsekanabo agomba gufatwa nk’uwari umuyoboke w’umutwe wa FDLR. Kuri we, ‘Abega’ agomba gufatwa nk’uko abandi barwanyi bagejejwe mu Rwanda bafatwa, agasubizwa mu buzima busanzwe. Abajijwe ingero, yavuze Jenerali Paul Rwarakabije wabaye umuyobozi wa FDLR kandi akaba yarashyizwe mu nzego z’ubuyobozi bw’igihugu ubwo yari ageze mu Rwanda. Gusa yavuze ko atagomba kubazwa ibyaha byakozwe n’uyu mutwe kuko atari umuyobozi wayo ngo abe yaratanze amabwiriza ku barwanyi. Ubushinjacyaha ariko bwo busanga uyu mugabo akwiye kuryozwa ibyakozwe n’abarwanyi b’uyu mutwe ku butaka bw’u Rwanda kuko yari ashinzwe iperereza ryawo. Col ‘Abega’ ahakana kandi uruhare mu bwicanyi aregwa n’ubushinjacyaha nk’uko BBC dukesha iyi nkuru ibitangaza. Yabwiye urukiko ko akazi ke k’iperereza yagakoreraga mu biro akaba atarigeze agira uruhare mu bitero byahitanye abantu. Ignace Nkaka na we yasabye gusubizwa mu buzima busanzwe nk’uko byakorewe abandi bahoze ari abarwanyi. Aba bombi bafashwe mu mpera y’umwaka wa 2018 bafatiwe ku mupaka wa Uganda na Congo.Baregwa kujya mu mutwe wa gisirikare utemewe n’amategeko. Kugira uruhare mu mugambi wo kugirira nabi ubutegetsi, bemera bibiri cyakora bagahakana kuba baragize uruhare mu bikorwa by’iterabwoba. Iburanisha ritaha ryashyizwe ku itariki ya 4 z’ukwezi kwa kabiri, abaregwa bakaba bategujwe ko bagomba kwitegura no gutanga ingingo za nyuma zibashinjura.
Lt Col Jean Pierre Nsekanabo uzwi nka Abega wari ushinzwe iperereza mu mutwe wa FDLR (iburyo) na Ignace Nkaka wavugiraga FDLR/ BBC
