Umutwe wa M23 kuri uyu wa Mbere tariki ya 27 Gashyantare 2023, wahanuye indege y’intambara y’Igisirikare cya Repubulika Iharanira Demokarasi ya Congo (FARDC).
Amashusho arimo akwirakwira ku mbuga nkoranyambaga yerekana iyi ndege irimo iguruka, mbere yo guhita iraswa.
Umuvugizi w’Igisirikare cya M23, Major Willy Ngoma, yemereye BWIZA ko aya mashusho yizewe ndetse anayihamiriza koko ko M23 yahanuye iriya ndege y’Igisirikare cya Congo.
Nta yandi makuru arambuye iki gitangazamakuru kirahabwa.
Amakuru cyakora avuga ko kuri uyu wa Mbere Igisirikare cya Congo kitatabaje indege zacyo z’intambara (Sukhoi-25) ngo zihe umusada Ingabo zirwanira ku butaka, mu rwego rwo gusubiza inyuma inyeshyamba za M23 zasatiraga Umujyi wa Sake.
Kugeza ku manywa imirwano ikomeye yarimo ijya mbere mu bilometero byibura birindwi uvuye muri uriya mujyi wo muri Teritwari ya Masisi.
M23 irimo kugerageza kwigarurira Sake, mu gihe ejo ku Cyumweru abarwanyi bayo bari bigaruriye agace gakungahaye ku mabuye y’agaciro ka Rubaya gaherereye mu burengerazuba bw’uriya mujyi.
