Perezida wa Mali, Ibrahim Boubacar Keita na Minisitiri w’Intebe w’icyo gihugu, Boubou Cisse, bafungiwe mu murwa mukuru Bamako n’agatsiko n’abasirikare bagerageje gukora Coup d’Etat kuri uyu wa kabiri nyuma yo kubata muri yombi.
Perezida wa Mali na Minisitiri w’Intebe w’icyo gihugu batawe muri yombi nyuma y’amasaha make abasirikare bagerageje guhirika ubutegetsi bagabye igitero ku kigo cya gisirikare cyo mu mujyi wa Kati, wegereye umurwa mukuru, Bamako.
BBC ivuga ko uretse igitero cyagabwe kuri kiriya kigo cya gisirikare, i Bamako agatsiko k’insoresore kanatwitse inyubako ya Guverinoma ya Mali.
Agatsiko k’abasirikare bagerageje guhirika ubutegetsi bwa Mali kayobowe na Col Malick Diaw wari Umuyobozi wungirije w’Ikigo cya Kati cyo kimwe na General Sadio Camara, nk’uko byatangajwe na Abdoul Ba wa BBC Afrique.
Magingo aya abayobozi batandukanye hirya no hino ku Isi bamaganye iriya Coup d’Etat yageragejwe muri Mali.
Umuyobozi wa Komisiyo y’Umuryango wa Afurika yunze Ubumwe, Moussa Faki Mahamat yamaganye yivuye inyuma ifungwa rya Perezida wa Mali, aboneraho gusaba Imiryango Mpuzamahanga itandukanye guhuza imbaraga mu kurwanya icyo ari cyo cyose cyakoranwa igitugu nka bumwe mu buryo bwo gushyira iherezo ku bibazo byugarije Mali.
Ati: “Namaganye nivuye inyuma ifungwa ry’agahato rya Perezida wa Mali Ibrahim Boubacar Keita, Minisitiri w’Intebe n’abandi bagize Guverinoma ya Mali kandi ngasaba ko bahita barekurwa.”
Imiryango Moussa Faki yahamagariye gukemura ibibazo bya Mali irimo Umuryango w’Ubukungu Uhuriwemo n’ibihugu byo muri Afurika y’Uburengerazuba (ECOWAS), Umuryango w’Abibumbye ndetse n’Umuryango Mpuzamahanga wose.
Umunyamabanga Mukuru w’Umuryango w’Ibihugu bikoresha Ururimi rw’Igifaransa (La Francophonie), Mme Louise Mushikiwabo, na we yamaganye ihirikwa ry’Ubutegetsi rinyuranyije n’Itegeko Nshinga rya Mali ryageragejwe muri kiriya gihugu.
La Francophonie yavuze ko “irwanya impinduka izo ari zo zose za politiki zakorwa hirengagijwe itegeko nshinga”, iboneraho gusaba abo bireba bose guhuza imbaraga mu rwego rwo gushakira ibisubizo ibibazo bya Mali.
Umunyamabanga Mukuru w’Umuryango w’Abibumbye, Antonio Guterres, na we yamaganye ifungwa rya Perezida wa Mali, Ibrahim Boubacar Keita n’abagize guverinoma y’igihugu cye, asaba ko bahita barekurwa, nk’uko umuvugizi w’umuryango w’abibumbye, Stephane Dujarric yabitangaje.
Guterres yasabye ko “muri Mali hasubizwaho bidatinze itegeko nshinga ndetse n’amategeko y’igihugu akongera gukurikizwa.”
Perezida wa Mali na benshi mu bagize Guverinoma ya kiriya gihugu, batawe muri yombi nyuma y’igihe kirekire muri Mali habera imyigaragambyo ikomeye y’abatari bashyigikiye Perezida Ibrahim Keita bamusabaga kwegura.
Bamushinjaga kudashyiraho gahunda ihamye mu kuzahura ubukungu bwa Mali, ibirenze ibyo akaba yarananiwe guhashya imitwe yitwaje intwaro imaze igihe iteza umutekano muke mu gihugu.
Ibibazo byo muri Mali byaganiriweho kenshi n’ibihugu byo mu Burengerazuba bwa Afurika byabyinjiyemo nk’abahuza, gusa kumvikanisha impande zari zihanganye biba ingorabahizi.
