Amwe mu makipe yo hanze akinamo abakinnyi bakomoka mu Rwanda banakinira ikipe y’igihugu Amavubi yarakinnye mu mpera z’iki cyumeru, Manishimwe Emmanuel ndetse na Manzi Thierry babasha gutwara igikombe.
Ku wa gatandatu ubwo ikipe ya FAR Rabat ikinamo ba myugariro babiri b’abanyarwanda aribo Manishiimwe Emmanuel uzwi nka Mangwende ndetse na Manzi Thierry yakinaga na Moghreb Tetouan umukino wa nyuma w’igikombe cy’umwami muri Maroc, FAR Rabat ibasha kucyegukana itsinze Moghreb Tetoun 3-0.
Mangwende yakinnye umukino wose mu gihe Manzi we yabanje ku ntebe y’abasimbura.
Mu cyiciro cya 2 mu gihugu cya Portugal ahakina myugariro w’Amavubi Mutsinzi Ange Jimmy mu wa CD Trofense, shampiyona yashojwe Trofense ibashije kuguma mu cyiciro cya kabiri.
Ni nyuma yo gutsinda ku wa gatandatu Vila franquense ibitego 4-2, mu mukino wa shampiyona y’icyiciro cya kabiri Ange yabanje mu kibuga nkuko bisanzwe.
Shampiyona yarangiye Trofense iri ku mwanya wa 13 n’amanota 40, irusha Covilha ibanziriza amakipe yamanutse mu cyiciro cya 3 amanota 4 , hanyuma ikarushwa na Rio Ave yarangije itwaye igikombe amanota 30.
Mu gihugu cya Norvège mu cyciro cya 2 ahakina umunyezamu w’ikipe y’igihugu Amavubi, Buhake Twizere Clement wa Strommen, ku wa Gatandatu bari bakiriwe na Halden maze Strommen ibasha gutsinda iyi kipe ibitego 2-1.
Buhake yakinnye wose nk’umunyezamu ngenderwaho ubu muri iyi kipe.
Muri Suède mu cyiciro cya 2 ho hakina umukinnyi w’ikipe y’igihugu Amavubi, Rafael York ukinira ikipe ya AFC Eskilstuna, ariko ku wa gatandatu ntabwo bahiriwe kuko batsinzwe na Halmstad 2-1 ubwo bari basuye iyi kipe, mu mukino York yakinnye wose.
