Meddy arashaka akana kagaragaye kabyina indirimbo ye

Yabitangarije ku rubuga rwa Twitter nyuma yo kubona videwo uyu mwana yafashwe agaragaza impano idasanzwe mu kubyina indirimbo z’abahanzi batandukanye. Ati: “Ndi gushaka uyu mwana, uwaba azi aho namukura, yandya akara.”

Mu gihe Meddy ashaka uyu mwana, umunyamakuru witwa Irene Murindahabi yashakishije aka kana, amenya ko gaherereye mu Karere ka Bugesera, unurenge wa Kanazi.

Iwabo mu rugo, bakita Karyuri. Ni akana gafite imyaka 8 y’amavuko, ntikiga nk’uko kabitangarije uyu munyamakuru. Kavuze ko kigishwa kubyina n’akandi kana kagenzi kako, kajya kureba indirimbo kuri televiziyo kamara kakaza bagashyira mu bikorwa ibyo kabonye.

Uyu mwana amenyekanye nyuma y’undi witwa Bunani videwo ye yakwiye Isi yose, ubwo yabyinaga indirimbo ‘Kungola’ ya Sunny na Bruce Melody. Umunanzi w’umunyarwandakazi, Sunny, yiyemeje gufasha uyu mwana akiga ndetse amwemerera n’ubundi bufasha bw’ibanze.