Musanze: Abayobozi na ba DASSO baherutse gukubita abaturage bahagaritswe ku mirimo

Ubuyobozi bw’akarere ka Musanze, bwatangaje ko bwahagaritse by’agateganyo abayobozi bo mu murenge wa Cyuve baherutse kugaragara mu mashusho bakubita abaturage.

Abahagaritswe ni abaheruka gutabwa muri yombi n’urwego rw’igihugu rw’Ubugenzacyaha, barimo Sebashotsi Gasasira Jean Paul wari umunyamabanga Nshingwabikorwa w’umurenge wa Cyuve, umunyamabanga Nshingwabikorwa w’akagari ka Kabeza, Tuyisabimana Jean Léonidas, DASSO Nsabimana Anaclet na DASSO Abiyingoma Sylvain.

Uko ari bane bakurikiranweho gukubitira Dushime Jean Baptiste na Nyirangaruye Uwineza Clarisse mu gasoko kitwa ‘Ku Ngagi’.

Ubuyobozi bw’akarere ka Musanze bubinyujije kuri Twitter bwagize buti”Nyuma y’amakuru ajyanye no gukubita abaturage mu Murenge wa Cyuve, akarere ka Musanze kahagaritse ku mirimo by’agateganyo ababigizemo uruhare, bakomeje gukurikiranwa n’Inzego zibishinzwe.”

RIB yatangaje ko bariya bayobozi uko ari bane bamaze gushyikirizwa ubushinjacyaha.