Inama mpuzamahanga yiga ku ndwara ya Coronavirus yagombaga kubera New York muri Leta Zunze Ubumwe z’Amerika yasubitswe kubera iki cyorezo. Ibi bibaye mu gihe hirya no hino ku Isi hari kugaragara inkundura yo guhagarika ibikorwa bitandukanye bihuriza imbaga y’abantu hamwe nk’amarushanwa cyangwa inama mu rwego rwo kwirinda ikwirakwizwa ry’iki Cyorezo. Amakuru dukesha Bloomberg News avuga ko kuri uyu wa Gatanu Inama ku bubanyi n’Amahanga ifite umutwe ugira uti” Gukora Ubucuruzi n’iki Cyorezo cya Coronavirusi” yagombaga guteranyiriza hamwe abaturutse mu bihugu bitandukanye biga ku buryo Ubucuruzi bwakorwa ariko hakomeza kwirindwa iki cyorezo. Inama yahagaritswe hirindwa ko yateza ikwirakwira ry’iyi ndwara imaze gusakara imigabane yose. Itangazamakuru ryo muri iki gihugu kandi rivuga ko n’izindi nama zagombaga kubera i New York, Washington DC no mu bindi bice bya Leta Zunze Ubumwe z’Amerika na zo zahagaritswe guhera tariki 3 Werurwe kugeza tatiki 3 Mata 2020. Inama n’amahuriro birenga 50 byateganyaga guhuriza hamwe abantu babarirwa kuri miliyoni imwe byamaze guhagarikwa muri Leta Zunze Ubumwe z’Amerika hirindwa ikwirakwizwa rya Corona Virusi. Ku mibare igaragazwa n’urubuga rwa Worldometer, Leta Zunze Ubumwe z’Amerika harabarwa abanduye iyi Virusi 1,329 harimo 29 baje biyongera ku mubare warusanzwe.
