Urwego rw’Igihugu Ngenzuramikorere, RURA, ruraburira abatega imodoka rusange ko nta modoka n’imwe yemerewe guhaguruka muri gare hejuru ya Saa kumi n’ebyiri z’umugoroba.
Biri mu rwego rwo gushyira mu bikorwa amabwiriza yasohotse mu byemezo by’inama y’Abaminisitiri yateranye ejo tariki 26 Kamena 2020, agenga ikumira ry’ubwandu bushya bw’icyorezo cya koronavirusi.
RURA yaburiye abagenda mu modoka rusange ko uzajya arenza saa kumi n’ebyiri z’umugoroba atazajya yoroherwa no kubona imodoka muri gare.
Mu butumwa bunyuranye RURA ikomeje gutambutsa ku mbuga zayo nkoranyambaga, yasabye abagenzi bose bakoresha imodoka rusange gutaha hakiri kare ku buryo isaha ya Saa moya igomba kugera bose bageze mu ngo zabo.
RURA yagize iti: “Mu rwego rwo kubahiriza ibyemezo by’Inama y’Abaminisitiri, RURA iributsa abakoresha imodoka zitwara abagenzi mu buryo bwa rusange ko bakwiye gutega imodoka hakiri kare, kuko nta modoka yemerewe gutwara abagenzi bava muri gare nyuma ya 18:00.”
Inama y’abaminisitiri yateranye ku munsi wejo ku kane, yemeje ko ingendo ku modoka rusange zitwara abagenzi hagati y’Intara n’Umujyi wa Kigali zibujijwe. Iyi nama kandi yananzuye ko isaha ntarengwa yo kuba buri muturage yageze mu rugo ari saa moya(19H00) z’umugoroba bivuye ku saha ya saa Tatu (21h00) yari imenyerewe.
Ingendo mu modoka rusange hagati mu ntara zo zirakomeza ariko hubahirizwa amabwiriza yo kwirinda icyorezo cya Covid-19.
