Ishami ry’Umuryango w’Avibumbye ryita ku buzima, OMS ryahagaritse gukora igerageza ry’ umuti wa Hydroxychlroquine ku barwayi ba Coronavirus nk’umwe mu miti yakorwagaho ubushakashatsi mu gushaka umuti cyangwa urukingo by’iyi ndwara, ni nyuma y’aho bigaragariye ko uyu muti ari nyirabayazana w’imfu nyinshi z’abahitanwa n’iki cyorezo.
Hydroxychroloquine isanzwe izwi mu kuvura indwara ya Malaria guhera mu 1955 isigaye ikoreshwa n’ibihugu byinshi mu kuvura abarwayi barwaye icyorezo cya Coronavirus, gusa OMS yo yatangaje ko ubushakashatsi bwayo bwagaragaje ko uko umurwayi wa Covid-19 awuhawe aba yongererwa ibyago byo guhitanwa nayo.
Itsinda ry’abashakashatsi ba OMS bakoze isuzuma bise ‘Solidarity Trial’ muri raporo yaryo yatangajwe ku itariki 20 Gicurasi 2020 ryavuze ko uyu muti wageragerejwe ku barwayi 3700 bo mu bihugu 17 hagamijwe kurebwa niba koko wakwemezwa bidasubirwaho ko uvura, gusa ryasanze umubare munini w’abawuhawe barahise bapfa mu buryo bwihuse abandi bakamara igihe kinini mu bitaro kurusha abatarawuhawe.
Kuri uyu wa Mbere Umuyobozi wa OMS, Dr Tedros Adhanom Ghebreyesus nibwo yatangaje ko OMS ihagaritse ubufatanye ubwo aribwo bwose n’ibihugu mu kugerageza uyu muti anasaba ibyawukoreshaga mu kwita ku barwayi ba Covid-19 kuba biwuhagaritse.
Uyu muti uhagaritswe nyuma y’icyumweru kimwe Perezida wa Leta Zunze Ubumwe za Amerika Donald Trump atangaje ko awufitiye ikizere kuburyo yanitangarije ko amaze ibyumweru bibiri awufata buri munsi agamije kwikingira.
Kugeza ubu iki cyorezo kimaze kwandurwa n’abarenga miliyoni 5.6 kigahitana abagera ku 349,000, kugeza ubu nta muti n’urukingo cyari cyabonerwa. Dr Tedros yavuze ko hari imiti myinshi yatangiye kugeragezwa na OMS ishobora kuzavamo umuti wacyo mu bihe biri imbere.
