Perezida wa Mozambique, Filipe Nyusi, yashyizeho abaminisitiri bashya barimo uw’Ingabo n’uw’umutekano w’imbere mu gihugu basimbuye abo aheruka kwirukana.
Mu ntangiriro z’iki cyumweru ni bwo Perezida Filipe Nyusi yirukanye ku mirimo uwari Minisitiri w’Ingabo, Jaime Neto, n’uwari uw’Umutekano w’Imbere mu gihugu, Amade Miquidade.
Itangazo ryirukana Minisitiri Neto ryasohotse ku wa 10 Ugushyingo 2021 rivuga ko “Perezida wa Repubulika, Filipe Jacinto Nyusi yirukanye Jaime Bessa Augusto Neto mu biro bya Minisitiri w’Ingabo”.
Iri tangazo ryasohotse nyuma y’iryirukana Minisitiri Miquidade, gusa impamvu aba bombi birukanywe ntabwo yatangajwe.
Perezida Filipe Nyusi kuri ubu yamaze gushyiraho Madamu Arsenia Felicidade Felix Massingue wahoze ari Komiseri Mukuru w’Ibiro bishinzwe abinjira n’abasohoka nka Minisitiri wa mbere w’Umutekano w’imbere mu gihugu mu mateka ya Mozambique w’umugore.
Perezida Filipe Nyusi kandi yagize Maj Gen Cristóvão Artur Chume Minisitiri mushya w’Ingabo za Mozambique.
Gen Cristóvão yari asanzwe ari Umugaba w’Ingabo za Mozambique zirwanira ku butaka, by’umwihariko akaba ari na we wari uyoboye ibikorwa by’ingabo za kiriya gihugu mu ntara ya Cabo Delgado aho zimaze igihe zihanganye n’ibyihebe.
