Perezida Donald Trump wa Leta zunze ubumwe za Amerika, yaburijemo gahunda yo guha inkingo za COVID-19 abakozi bo mu biro bye bya White House yari iteganyijwe mu minsi iri imbere.
Ni nyuma y’uko ku Cyumweru ibiro bya Perezida wa Amerika byari byatangaje ko abakozi ba White House bari mu bantu ba mbere bari guhabwa urukingo rwa Pfizer / BioNTech rwatangiye gutangwa muri Amerika.
Perezida Trump yavuze ko ahagaritse iyi gahunda, gusa ntihazwi impamvu yahisemo gufata kiriya cyemezo.
Cyakora cyo ubwo ibiro bye byatangazaga ko ababikoramo ari bo bazatangira guhabwa inkingo za Virusi ya Corona, byari byateje impaka nyinshi ku mbuga nkoranyambaga hibazwa impamvu hatafatwa iya mbere mu guha inkingo abababaye kurusha abandi ahubwo hagakingirwa abishoboye.
Leta zunze ubumwe za Amerika ziheruka kwemeza ko urukingo rwa Pfizer / BioNTech rufite ubushobozi bwo gukingira COVID-19 ku kigero cya 95%.
Kuva ejo ku wa Mbere muri Amerika hatangiye gutangwa dose miliyoni eshatu za ruriya rukingo, ku masite atandukanye ari muri leta 50 zigize kiriya gihugu.
Nko muri Leta ya Michigan abakora mu nzego z’ubuzima n’abayobozi bari mu ba mbere bahawe ziriya nkingo.
Iboneka ry’urukingo rwa COVID-19 muri Amerika ryaje ari nk’igisubizo kuri kiriya gihugu, bijyanye n’uko kiri mu byoretswe cyane na kiriya cyorezo.
Imibare yerekana ko muri iki gihugu habarurwa abasaga miliyoni 16 banduye kiriya cyorezo, mu gihe abo kimaze guhitana barenga Ibihumbi 300.
