Ikipe ya Paris Saint-Germain yo mu Bufaransa, yahawe igikombe cya shampiyona y’iki gihugu nyuma y’uko shampiyona irangijwe kubera icyorezo cya Covid-19.
Ni igikombe cya karindwi cya shampiyona y’Abafaransa PSG yegukanye mu myaka umunani ishize, nyuma y’uko ubwo shampiyona yasubikwaga muri Werurwe uyu mwaka yarushaga Olympique de Marseille amanota 12.
Amanota ikipe yagiye itwara kuri buri mukino ni yo yagendeweho bagena uko shampiyona y’Abafaransa yasojwe, bijyanye n’uko amakipe amwe yari amaze gukina imikino 27 andi yarakinnye 28.
PSG na Olympique de Marseille ni zo zahise zibona itike yo gukina UEFA Champions league, mu gihe Rennes ya gatatu igomba guca mu majonjora y’imikino ya nyuma ya Champions league.
Gusoza shampiyona y’Abafaransa kandi byasize amakipe ya Amiens na Toulouse amanutse mu kiciro cya kabiri, Lorient ihabwa igikombe cya shampiyona y’ikiciro cya Kabiri inahita izamukana mu cya mbere na Lens.
Ishyirahamwe rya ruhago mu Bufaransa (FFF) rifite mu biganza shampiyona y’ikiciro cya gatatu ni ryo rigomba kugena amakipe azazamuka mu kiciro cya kabiri ndetse n’ayo muri iki kiciro agomba kujya mu cya gatatu.
PSG mu itangazo yasohoye, yavuze ko igikombe yatwaye igituye abakora mu nzego z’ubuzima bahanganye na Covid-19.
Yagize iti”Iki gikombe cya shampiyona cya cyenda dutwaye mu mateka PSG igituye bakozi bose b’ubuzima, ndetse n’ibihumbi by’inzobere zikomeje gufata iya mbere buri munsi kugira ngo igihugu gikomeze kubaho.”
Nasser Al Khelaifi uyobora iyi kipe we yagize ati “Ndashimira abakinnyi, abatoza, abashinzwe tekinike n’abaganga, ndetse n’abakozi bose b’iyi kipe ku bw’akazi gakomeye bakoze. Iki gikombe ni ishimwe ku bw’imirimo yabo ya buri munsi. Muri ibi bihe bigoye, ndizera ko iki gikombe kizazana umunezero n’icyizere ku bafana bacu bose, kandi ndabashimira ku nkunga yabo itajegajega iyobora Paris Saint Germain imbere.”
Uretse kurangiza shampiyona ya 2019/2020, hanzuwe ko iya 2020/2021 izatangira hagati y’itariki ya 22 n’iya 23 Kanama.
Shampiyona y’Abafaransa yiyongereye ku y’Abaholandi yagizwe imfabusa mu cyumweru gishize, mu gihe ku wa mbere w’iki cyumweru abakinnyi bo muri shampiyona y’Ababiligi banze gutora ko shampiyona yabo iseswa.
