Kera kabaye ikipe ya Rayon Sports yemeje ko yamaze kugurisha muri Police FC Rutanga Eric wahoze ari Kapiteni wayo, ku bwumvikane bw’amakipe yombi.
Yabitangaje nyuma y’amezi atatu ikipe ya Police itangaje ko uyu musore ukina inyuma ku ruhande rw’ibumoso yamusinyishije.
Police FC yemeje ko yasinyishije Rutanga imyaka ibiri ku wa 28 Gicurasi, nyuma y’ukwezi kumwe bitangazwa ko yerekeje muri Yanga Africans yo muri Tanzania.
Iyi kipe ikunzwe kurusha izindi muri Tanzania uheruka kumubwira ko atakiri mu mibare yayo, ibisobanura ko azakinira Police FC mu mwaka utaha w’imikino.
Rayon Sports ibinyujije kuri Twitter yayo yagize iti: Nyuma y’ubwumvikane bw’impande zombi hagati ya Rayon Sports na Police FC, Rayon Sports yagurishije Rutanga Eric mu ikipe ya Police FC. Urabeho Rutanga, warakoze ku myaka itatu wadukiniye.”
Rayon Sports ntiyatangaje umubare w’amafaranga yagurishije uyu mugabo wakuriye mu ishuri ry’umupira w’amaguru rya APR FC.
Rutanga yageze muri Rayon Sports muri 2016 avuye muri mukeba wayo APR FC, ayifasha kwegukana ibikombe bitandukanye bikinirwa hano mu Rwanda birimo bibiri bya shampiyona (2017 na 2019).
Rutanga kandi ni umwe mu bakinnyi bari bagize Rayon Sports yageze muri 1/4 cy’irangiza cya CAF Confederation Cup mu myaka ibiri ishize.
