Mu ruzinduko yakoreye muri Repubulika ya Demokarasi ya Congo kuva ku wa Kabiri, itariki ya 13 Ukwakira, mu rwego rwo gukurikirana aho guhangana n’icyorezo cya virusi ya Ebola bigeze, Umuyobozi Mukuru w’Ikigo cya Afurika gishinzwe Kugenzura no Gukumira indwara (Africa CDC) Jean Kaseya, yagaragaje impungenge z’imicungire idahwitse y’amafaranga yatanzwe n’abaterankunga i Kinshasa mu rwego rwo kurwanya iki cyorezo.
Mu kiganiro n'abanyamakuru ku wa Gatatu, itariki ya 14 Ukwakira, i Kinshasa, Umuyobozi Mukuru wa Africa CDC yavuze ko muri miliyoni 926.66 USD zimaze gutangwa n’abaterankunga batandukanye, miliyoni 700 USD zaburiwe irengero.
Ku bwe, Ikigo cy'igihugu gishinzwe ubuzima rusange (INSP) cyagaragaje ko cyabashije kubona miliyoni zisaga 200$, muri zo hafi miliyoni 100 zikaba zitarakoreshwa nk’uko inkuru dukesha ACTUALITE.CD.
Ati: "Abaterankunga baduhaye amakuru arambuye. Miliyoni 926.66 z'amadolari y'Abanyamerika yasohowe n'abaterankunga ahabwa abafatanyabikorwa ngo bashyire mu bikorwa. Dr. Kalambayi n'Umuyobozi mukuru wa INSP bateguye inama, yitabiriwe n’abatageze kuri 30%. Muri iyo nama, miliyoni 200 z'amadolari y'Abanyamerika zarakurikiranwe. Muri aya mafaranga yose, havuzwe ko miliyoni 100 z'amadolari zihari ariko zitarakoreshwa. Ibi bivuze ko aya mafaranga akiri mu bafatanyabikorwa. Ariko ndavuga itandukaniro riri hagati ya miliyoni 900 na miliyoni 200 abafatanyabikorwa batangaje. Ubwo ni miliyoni 700 USD zo gushaka, kandi zihari. ”
Umuyobozi wa Africa CDC yerekanye ko azarwana ubudacogora mu kugaruza aya mafaranga, ahereye ku gusaba ibisobanuro buri mufatanyabikorwa wabigizemo uruhare.
Ati: "Dufite imiyoboro yacu y'itumanaho n'abaterankunga: hari inyandikomvugo. Ibyo dutanga byose bishingiye ku bimenyetso. Iyi si imibare twafashe gutyo gusa, ahubwo twayohererejwe n'abaterankunga. Kandi ntuzibagirwe ko nitabiriye inama ya G20, kandi aho buri muterankunga yanditswe harahari".
Mu kiganiro n'abanyamakuru cyabaye ku wa Gatanu, itariki ya 2 Ukwakira, Umuyobozi mukuru w'ikigo cy'igihugu gishinzwe ubuzima rusange muri Congo (INSP), Dieudonné Mwamba, yagaragaje ko mu bafatanyabikorwa bagera kuri 94 bemewe na DRC mu guhangana n’icyorezo, 25 gusa ni bo batanze amakuru ku mafaranga yakiriwe n'imikoreshereze yayo.