U Rwanda rwavuze ko Repubulika Iharanira Demokarasi ya Congo yagiye yifashisha indi mitwe ibiri yitwaje intwaro irwanya ubutegetsi bw’u Rwanda, mu mirwano ingabo za FARDC zirimo kurwana na AFC/M23 mu burasirazuba bwa Congo.
Byatangajwe na Ambasaderi w’u Rwanda muri Loni, Martin Ngoga, mu ijambo yagejeje ku Kanama k’Umuryango w’Abibumbye gashinzwe Umutekano ku Isi ku wa Kabiri tariki ya 29 Nzeri 2026.
Ngoga yavuze ko muri Kanama FARDC yakoze ibikorwa bya gisirikare iri kumwe n’abarwanyi bo mu mitwe ya CNRD, FLN, FDLR na Wazalendo/Nyatura muri Teritwari ya Walungu, muri Kivu y’Amajyepfo.
Ambasaderi Ngoga yavuze ko amakuru ku mikoranire ya FARDC n’iyi mitwe yakomeje gutangwa mu buryo buhoraho binyuze mu nzego zashyizweho mu rwego rw’amasezerano ya Washington, zirimo Joint Oversight Committee na Joint Security Coordination Mechanism.
Ngoga kandi yagaragaje ko ikibazo atari igikorwa kimwe cyabaye rimwe, ahubwo ko u Rwanda rubona ko hari “imiterere y’ubufatanye” yakomeje kuva muri Mutarama kugeza muri Kanama 2026.
Mu byo Ngoga yagaragarije Akanama k’Umutekano hanarimo ibikorwa bya FARDC byo muri Gashyantare na Werurwe uyu mwaka, aho yoherereje imitwe irimo FDLR za toni z'ibikoresho bya gisirikare birimo imbunda n'amasasu ndetse n'ibyo kurya, mu bice bitandukanye bya Teritwari ya Walikale.
Yavuze kandi ko ku wa 15 Kanama 2026, ingabo za FARDC zakoranaga ibikorwa bya gisirikare muri Walungu zifatanyije na CNRD, FLN, FDLR ndetse na Wazalendo/Nyatura.
Ibi bivuze ko, mu ishusho yagaragajwe na Kigali, Kinshasa itari gukoresha gusa Wazalendo n’izindi nyeshyamba zo muri Congo mu guhangana na AFC/M23, ahubwo ngo yaba yaragereye no ku mitwe ifite inkomoko mu Rwanda kandi ifite amateka yo kurwanya ubutegetsi bw’u Rwanda.
CNRD ni umutwe w’Abanyarwanda witwaje intwaro wari warashinze ibirindiro muri Kivu y’Amajyepfo, mu gihe FLN ari umutwe w’abarwanyi ufitanye isano na MRCD. FLN yamenyekanye cyane nyuma y’ibitero byagabwe mu Majyepfo y’u Rwanda mu 2019.
Amateka y’iyi mitwe agaragaza ko CNRD na FLN byigeze gukora nk’imitwe yitwaje intwaro irwanya ubutegetsi bw’u Rwanda.
Kigali isanga kuba imitwe nk’iyi yaba iri gukorana na FARDC mu mirwano yo muri RDC ari ikimenyetso cy’uko Kinshasa ikomeje gukoresha imitwe yitwaje intwaro mu ntambara ihanganyemo na AFC/M23.
Ngoga yavuze iby'imikoranire ya Kinshasa n'iriya mitwe, mu gihe ikibazo cy’imikoranire ya FARDC na FDLR ari kimwe mu ngingo ziri hagati mu biganiro bya Washington bigamije gushaka umuti w’intambara yo mu burasirazuba bwa RDC.
U Rwanda ruvuga ko gusenya FDLR no guhagarika ubufatanye ubwo ari bwo bwose hagati yayo na FARDC, ari imwe mu nshingano z’ingenzi zashyizwe mu masezerano ya Washington.
Ku rundi ruhande, RDC ivuga ko amasezerano yagiranye na FDLR agamije gushyira hasi intwaro hasi no kuva mu bikorwa by’ubugizi bwa nabi.
Icyakora, Kigali ivuga ko ibyo biganiro bidahindura inshingano RDC ifite zo gusenya uriya mutwe, ahubwo ko ibiganiro bishobora kuba uburyo bwo gutinza ishyirwa mu bikorwa ry’amasezerano.
Ngoga yasabye ko ibyo impande zombi ziyemeje muri Washington bigomba kugenzurwa mu buryo bwigenga, anasaba uburyo bwo kugenzura bwahuriramo u Rwanda, RDC na Leta Zunze Ubumwe za Amerika.
U Rwanda rusanga kuba ikibazo cy’imitwe irwanya Kigali ikorera mu burasirazuba bwa RDC bitakiri ikibazo cy’imbere muri Congo gusa, ahubwo ko ari ikibazo gifitanye isano n’umutekano w’u Rwanda ndetse n’umuti urambye w’intambara ihanganishije FARDC n’abafatanyabikorwa bayo na AFC/M23.