Urwego rw’Ubugenzacyaha mu Rwanda (RIB) rutangaza ko amakuru yakwirakwijwe ku mbuga nkoranyambaga ko hari umuntu wa mbere Coronavirus yishe mu Rwanda ari ibihuha.
Mu minsi mike ishize, hari amakuru yasakaye ku mbuga nkoranyambaga nka Twitter, ko Umwongereza, Mathew Robert Wilson, w’imyaka 56, yapfiriye mu Rwanda azize Coronavirus (COVID-19). Uyu mwongereza yapfuye kuwa 5 Mata uyu mwaka, agwa aho yari atuye i Kacyiru mu Mujyi wa Kigali. Mu kuvuga kuri ayo makuru, Umuvigizi wa RIB, Marie Michelle Umuhoza, yabwiye The New Times ati ” Twagiye aho byabereye turi kumwe n’abaganga turi gukorana nabo mu gihe habaye urupfu rutunguranye. Ikigo gishinzwe Ubuzima mu Rwanda cyakoze isuzuma gisanga uwapfuye nta Coronavirus yari afite.” Umuhoza avuga ko ibyavuye mu gupima umurambo byahawe umuryango wa nyakwigendera kandi ngo ni nawo ufite uburenganzira bwo gutangaza ibisubizo aho bibaye ngombwa. Uhagarariye Ubwongereza mu Rwanda, Jo Lomas avuga ko ” Umunryango w’uwapfuye wakoranaga bya hafi na Leta y’u Rwanda.” Ko ” Ibyo gushyingura ntacyo nabivugaho n’ibintu bireba umuryango we.” Kugeza ubu inzego z’ubuzima mu Rwanda ntiziratangaza ko hari umuntu waba warishwe na Coronavirus. Zitangaza ko hari abantu barindwi ahubwo bayikize. Kugeza kuri uyu 9 Mata, zitangaza ko mu Rwanda hari abantu 110 basanzwemo iyi ndwara, muri aba 110 barindwi bamaze gukira . Ku isi yose, imibare ihindagurika uko amasaha agenda yerekana ko abantu 1,469,240, bamaze kwandura Coronavirus, imaze guhitana abagera ku 86,278 naho 316,500 bakaba barakize iki cyorezo.
2 Responses
RIB yavuze ko ari ibihuha byatangajwe ko hari uwishwe na Coronavirus mu Rwanda
Ubwo niba atari coronavirus ni urupfu rusanzwe cg yiyahuye?
RIB yavuze ko ari ibihuha byatangajwe ko hari uwishwe na Coronavirus mu Rwanda
Ubwo niba atari coronavirus ni urupfu rusanzwe cg yiyahuye?