Rusizi: Umwarimu akurikiranweho ingengabitekerezo ya Jenoside

Umwarimukazi wigisha ku Rwunge rw’Amashuri rwa Ntura Protestant mu Murenge wa Giheke mu Karere ka Rusizi, Nyirambonigaba Agnès kuva ku wa 26 Gashyantare ari mu maboko ya RIB Sitasiyo ya Kamembe akurikiranweho amagambo y’ingengabitekerezo ya Jenoside.

Uyu mwarimukazi ngo yabwiye umuyobozi we ushinzwe amasomo kuri iri shuri, Mukamuhirwa Médiatrice ko nakomeza kumugendaho amukangisha ko ingoma ari iyabo azamuhinahina amagufwa ye, akayasangisha aya bene wabo mu rwibutso rwa Jenoside rwa Gashirabwoba. Ibi ngo yarabisinyiye nk’uko Umuyobozi w’Ishami ry’Uburezi ku Karere ka Rusizi, Nsabimana Théogène yatangarije Bwiza.com.

Mu kiganiro na Bwiza.com, Umuyobozi W’Urwunge rw’Amashuri rwa Ntura Protestant, Niyonzima Jean Modeste,yemeje ko uyu mwarimukazi w’imyaka 43 y’amavuko, ufite abana 4 akaba yaratandukanye n’umugabo, yafashwe na RIB ku wa 26 Gashyantare imukuye kuri iri shuri ngo ajye gusobanura amagambo agaragaramo ingengabitekerezo ya Jenoside yavuze inshuro zirenze imwe.

Ayo mamgambo ngo yanayasubiyemo imbere y’Imuyobozi w’ishami ry’Uburezi ku Karere ka Rusizi mu nama yari yamuhuje n’abayobozi bose b’ibigo by’amashuri akorera mu Murenge wa Giheke ku wa 24 Gashyantare uyu mwaka.

Uyu muyobozi avuga ko iyi myitwarire Nyirambonigaba umaze imyaka irenga 10 akorera kuri iri shuri yayitangiye mu gihembwe cya 2 cy’amashuri cya 2018. Avuga ko mu ntangiro z’igihembwe cya mbere cy’uwo mwaka ataje ku kazi kuko ngo yari yaragiye kwivuza babona asa n’ufite ikibazo cyo mu mutwe kubera amagambo yavugaga. Avuga ko ndi yabonaga ibyo Nyirambonigaba yavugaga biterekeranye, aho yaje kuvurirwa mu bitaro bya CHUK agaruka ku kazi.

Akomeza avuga ko yagarutse yigisha neza bisanzwe ariko uko iminsi ishira umuyobozi ushinzwe amasomo Mukamuhirwa Médiatrice yajyaga kugenzura uko yigisha mu mwaka wa 2 w’amashuri abanza, akamubwira amagambo mabi agaragaramo ingengabitekerezo ya Jenoside.

Ibi ngo byabateye kwibaza ibyo ari byo birabayobera, Nyirambonigaba agahamagarwa n’ubuyobozi bw’ishuri araganirizwa bakagira ngo birarangiye ariko agakomeza.

Nyirambonigaba avuga ko uyu Mukamuhirwa yirirwa amushodeka ku murenge ngo ntakora neza, anagerageza kumucurira imigambi yo kumwimura bigafata ubusa, ngo aribeshya ntazabigeraho.

Ngo ishuri ryamukoreye raporo babona bigenda bifata indi ntera mu mwaka ushize wa 2019, ishyikirizwa umurenge, njyanama y’umurenge ifata icyemezo cyo gusaba akarere kumwimura ariko mu ntangiro z’uyu mwaka.

Akarere ngo kagaragaje ko gafite abarimu bake, ko ibyo kwimura byakorwa hamaze gukorwa ibizamini abimuwe bakabona ababasimbura ari bwo na we atimuwe ariko akomeza kuvuga ko byose ari imigambi icurwa n’uyu muyobozi ushinzwe amasomo.

Umuyobozi w’ishuri yagize ati ’’ Twabonye bikomeza kuba bibi cyane ku wa 19 Gashyantare dukorana inama n’abarezi bose tumubaza iby’imyitwarire ye ahita asubiza ati: ” Njye ngiye kujya nkora mpangara nguhangare,twese turi amagufwa yanamye ku gasozi, aye bazayajyane i Gashirabwoba (mu rwibutso rwa Jenoside yakorewe Abatutsi),ayanjye yo nzi ko bazayajyana mu irimbi rya Kigenge.’’

Ngo barabyoroheje inama irakomeza, bamukorera raporo ijyanwa ku murenge no ku karere, ku wa 24 Gashyantare mu nama yahuje umuyobozi ushinzwe uburezi ku rwego rw’akarere, Nsabimana Théogène n’abayobozi b’ibigo by’amashuri bikorera muri uyu murenge wa Giheke n’aba bombi bayitumijwemo, abajijwe icyo apfa n’umuyobozi we asubiramo ya magambo.

Icyo gihe ngo Nyirambonigaba yabwiye uyu muyobozi mu ruhame rw’abandi bayobozi n’amajwi afatwa ati: “Nta kibazo numva mfite ni ukuri. Iyo umuntu agukandagije ko ingoma ari iyabo na we umubwira ko nta kazi agomba gukora kamuha ibyo yifuza. None se ko yifuza kunyirukanisha ngo ndeke ibihumbi byanjye 70 ku kwezi aragira ngo mbireke nkore iki? Najye kurinda amagufwa ya bene wabo i Gashirabwoba. Ntafite abamushyigikiye se bamwereka ko ingoma ari iyabo batangiranye ikigo?’’

Uyu muyobozi avuga ko nta kindi yahise akora uretse kubimenyesha izindi nzego zirimo n’Urw’Ubugenzacyaha mu Gihugu (RIB) Nyirambonigaba akaba ari kubikurikiranwaho. Ati: “Ari kubikurikiranwaho ndetse n’akarere kamwandikiye ibaruwa imuhagarika by’agateganyo, igihe byamuhama yahita ahagarikwa burundu.’’

Umuyobozi w’Akarereka Rusizi wungirije ushinzwe imibereho myiza y’abaturage, Nsigaye Emmanuel na we yemeje aya makuru aho yagize ati: Ni byo arafunzwe ariko ibiri mu butabera sinabivugaho byinshi, ikizwi ni uko hari ibyaha akurikiranyweho bijyanye n’ingengabitekerezo ya Jenoside, ibindi biri mu iperereza.’’

Bwiza.com yagerageje kuvugisha umuvugizi wa RIB, Marie Michelle Umuhoza ku murongo wa telefone, inshuro 4 zose ntibyakunda, imwoherereza n’ubutumwa bugufi ngo agire icyo abivugaho ntiyabusubiza kugeza igihe iyi nkuru isohokeye.