Shampiyona ya Angola (Girabola) ikinamo rutahizamu Tuyisenge Jacques ukinira ikipe y’igihugu Amavubi, yaraye isheshwe kubera icyorezo cya Covid-19 gikomeje gushegesha Isi.
Ejo ku wa kane ni bwo iyi shampiyona yagizwe imfabusa, nyuma y’uko amakipe 15 yose ayikinamo atoye y’uko iseswa, ntihagire ikipe itwara igikombe cya shampiyona, imanuka mu kiciro cya kabiri cyangwa iva mu kiciro cya kabiri iza mu cyambere.
Iyi shampiyona yasheshwe, mu gihe Jacques Tuyisenge na Petro Atlético de Luanda akinira bari bayiyoboye n’amanota 54, barusha atatu Primerio de Agosto bahora bahanganye.
Ni mu gihe yaburaga imikino itanu yonyine ngo isozwe.
Cyakora cyo n’ubwo nta kipe igomba guhabwa igikombe cya shampiyona, byemejwe ko Petro de Luanda na 1º de Agosto ya kabiri zigomba gukina imikino ya CAF Champions league itaha.
Tuyisenge Jacques wakinaga umwaka we wa mbere muri Girabola, yageze muri Petro Atlético de Luanda mu mpeshyi y’umwaka ushize, avuye muri Gor Mahia yo mu gihugu cya Kenya.
Ishyirahamwe ry’umupira w’amaguru muri Angola, ryafashe icyemezo cyo gusesa shampiyona, mu gihe impuzamashyirahamwe y’UmIbira w’amaguru muri Afurika (CAF), iherutse gushyiraho itariki ya 05 Gicurasi nk’umunsi wa nyuma amashyirahamwe ya ruhago mu bihugu bigize Afurika agomba kuba yarangirijeho gutanga gahunda yo gusubukura cyangwa gusesa imikino.
Byitezwe ko ubuyobozi bw’ishyirahamwe ry’umupira w’amaguru mu Rwanda buzaterana muri Weekend, hagamijwe kurebera hamwe niba amakipe yahabwa ibikombe, niba hari ayamanuka andi akazamuka cyangwa niba shampiyona yagirwa imfabusa.
Nko muri Kenya shampiyona yabo barayisoje, Gor Mahia yari iya mbere ku rutonde rwa shampiyona ihabwa igikombe.
