Guverineri wa Banki Nkuru y’u Rwanda (BNR), Soraya Munyana Hakuziyaremye, yahawe igihembo cyo ku rwego rwa Afurika cy’umugore wagaragaje ubuhanganjye mu rwego rw’imari, ashimirwa uruhare rwe mu guteza imbere uru rwego no kwagura serivisi z’imari zigera ku baturage.
Iki gihembo cya African Woman in Finance Award yagishyikirijwe mu birori bya AFIS Awards 2026, bihuriza hamwe ibikorwa by’indashyikirwa mu rwego rw’imari ku mugabane wa Afurika.
Mu butumwa Banki Nkuru y’u Rwanda yashyize ku rubuga rwa X, yatangaje ko iki gihembo ari ikimenyetso cy’ishimwe ku buyobozi bwa Hakuziyaremye n’umuhate agaragaza mu guteza imbere serivisi z’imari no korohereza abaturage kuzigeraho.
Mu gutoranya uhabwa iki gihembo, harebwa ibigwi bye mu kazi, ubushobozi mu buyobozi, uruhare yagize mu iterambere ry’urwego rw’imari n’ibikorwa byafashije abaturage kubona serivisi z’imari mu buryo bworoshye.
BNR kandi yagaragaje ko iki gihembo kigaragaza uruhare rw’abagore mu buyobozi no mu ifatwa ry’ibyemezo bigena icyerekezo cy’iterambere ry’urwego rw’imari muri Afurika.
Soraya Hakuziyaremye yagizwe Guverineri wa Banki Nkuru y’u Rwanda ku wa 25 Gashyantare 2025, asimbuye John Rwangombwa. Yabaye umugore wa mbere uhawe izi nshingano mu mateka y’u Rwanda.
Mbere yo kugirwa Guverineri, yari amaze hafi imyaka ine ari Guverineri Wungirije wa BNR, umwanya yatorewe muri Werurwe 2021.
Yabanje kandi kuba Minisitiri w’Ubucuruzi n’Inganda kuva mu Ukwakira 2018 kugeza muri Werurwe 2021, aho yagize uruhare mu gushyira mu bikorwa gahunda ya Made in Rwanda igamije guteza imbere ibikorerwa mu gihugu, inganda n’ubucuruzi.
Mu rugendo rwe rw’akazi, Hakuziyaremye yanakoreye ibigo mpuzamahanga by’imari birimo ING Bank i Londres mu Bwongereza, BNP Paribas Group i Paris mu Bufaransa, Fortis Bank na Bank of New York Mellon i Bruxelles mu Bubiligi.
Ku bijyanye n’amashuri, afite impamyabumenyi mu micungire y’ubucuruzi yakuye muri Université Libre de Bruxelles mu Bubiligi, n’indi mu micungire mpuzamahanga yakuye muri Thunderbird School of Global Management muri Leta Zunze Ubumwe za Amerika. Yize kandi amasomo ajyanye n’ubuyobozi muri Kaminuza ya Oxford mu Bwongereza.