Rutahizamu wa Rayon Sports, Sugira Ernest, ntari mu bakinnyi ikipe y’igihugu ‘Amavubi’ iza kwifashisha kuri uyu wa Mbere ikina n’imisambi ya Uganda, mu mukino wa mbere wa CHAN 2020 iri kubera muri CamĂ©roun.
Sugira Ernest afite amakarita abiri y’umuhondo arimo iyo yeretswe ubwo yatsindaga Ethiopia igitego cyahesheje Amavubi itike agakuramo umupira, atamwemerera gukina uriya mukino wa Uganda.
Bijyanye no kuba Sugira aza kutagaragara muri uriya mukino, ubusatirizi bw’Amavubi bushobora kuza kuba buyobowe na Kapiteni Jacques Tuyisenge usanzwe akina aca ku mpande, mu gihe Nshuti Dominique Savio na Iradukunda Bertrand bashobora gukina iburyo n’ibumoso bwe.
Hakizimana Muhadjili araza kuba akina inyuma yabo, mu gihe ba myugariro bane ba APR FC bashobora gufatanya mu bwugarizi.
11 bashobora kubanza mu kibuga:
Umuzamu: Kwizera Olivier
Ba myugariro: Manzi Thierry, Mutsinzi Ange, Imanishimwe Emmanuel na Omborenga Fitina.
Abakina hagati: Kalisa Rashid, Niyonzima Olivier na Hakizimana Muhadjili.
Abataha izamu: Nshuti Dominique Savio, Iradukunda Bertrand na Jacques Tuyisenge.
