Tanzania: Abantu bashya 196 banduye Covid-19, abapfuye batandatu

Misitiri w’Intebe wa Tanzania, Kassim Majaliwa, yatangaje ko muri iki gihugu hagaragaye abarwayi bashya 196 ba Coronavirus, abanduye bose baba 480.

Minisitiri Majaliwa yavuze ko muri iki gihugu hanagaragaye abantu batandatu bashya bishwe na Coronavirus, bituma abantu bamaze kwicwa ni iki cyorezo kuva cyagaragara bwa mbere muri Tanzania baba 16.

Nk’uko Majaliwa yabisobanuye, abarwayi bashya 174 ni bo babonetse muri Tanzania abandi 22 baboneka mu birwa bya Zanzibar.

Yavuze kandi ko abamaze gukira Coronavirus mu gihugu cye bavuye kuri 48 bakagera kuri 167, barimo 36 bo muri Zanzibar na 83 b’imbere muri Tanzania.

Imibare y’abarwayi ba Coronavirus muri Tanzania ukomeje gutumbagira, mu gihe Perezida w’iki gihugu, Dr John Pombe Magufuli ari ku gitutu cyo kuba yaroroheje ingamba zo kwirinda kiriya cyorezo, bityo bikaba bikomeje kugira ingaruka ku gihugu cye ndetse no ku baturage ba Afurika y’Iburasirazuba muri rusange.