Saa Sita z’ijoro ry’itariki ya 5 Ukwakira 2020, ni bwo isoko ry’igura n’igurisha ry’abakinnyi ku mugabane w’Uburayi ryafunze imiryango, risiga amakipe amwe namwe akoze transferts zikomeye zo ku munota wa nyuma.
Transferts nk’iya Edinson Cavani werekeje muri Manchester United n’umunya-Ghana, Thomas Partey, wavuye muri Atletico Madrid yerekeza muri Arsenal, ziri mu zikomeye zabaye ku munota wa nyuma.
Muri rusange muri iyi mpeshyi habaye Transferts nyinshi zikomeye, gusa hari 10 za mbere zahenze kurusha izindi tugiye kubagezaho muri iyi nkuru.
10. Nathan Ake
Uyu myugariro muri iyi mpeshyi yavuye mu kipe ya AFC Bournemouth yerekeza muri Manchester City, atangwaho abarirwa muri miliyoni 46 z’ama-Euro.
9. Federico Chiesa
Uyu Mutaliyani ukina imbere ku mpande, aheruka kuva mu kipe ya Fiorentina yerekeza muri Juventus nk’intizanyo, gusa iyi kipe igomba kumutangaho miliyoni 50 z’ama-Euro imugura.
Ukuza kwa Chiesa muri Juventus kwahise gusohora umunya-BrĂ©sil Douglas Costa, yerekeza muri Bayern Munich yahoze akinira nk’intizanyo.
8. Thomas Partey
Uyu munya-Ghana ukina hagati mu kibuga, yerekeje muri Arsenal ku munota wa nyuma w’isoko ry’igura n’igurisha, nyuma yo kwishyura ‘release clause’ ya 51 z’ama-Euro yari afite muri Atletico Madrid.
Abakunzi ba Arsenal bafata uyu mwirabura nk’umusimbura w’Umufaransa Patrick Vierra bari bamaze igihe barabuze.
7. Ben Chilwell
Uyu myugariro ukina ku ruhande rw’ibumoso, yaguzwe na Chelsea avuye muri Leicester City.
Amakuru avuga ko Ikipe ya Chelsea yamutanzeho abarirwa muri miliyoni 53 z’ama-Euro.
6. Timo Werner
Werner, rutahizamu mpuzamahanga w’Umudage, yaguzwe na Chelsea muri iyi mpeshyi imukuye mu kipe ya Leipzig y’iwabo.
Werner unakinira Ikipe y’Abadage, yatanzweho akayabo ka miliyoni 55 z’ama-Euro.
5. Miralem Pjanic
Uyu ni Umunya-Bosnia & Herzegovina wageze muri FC Barcelona mu mpeshyi y’uyu mwaka avuye muri Juventus.
FC Barcelona yaguranye Pjanic umunya-BrĂ©sil Arthur Melo, gusa bivugwa ko iyo deal yahawe agaciro ka miliyoni 60 z’ama-Euro.
4. Ruben Dias
Uyu myugariro w’umunya-Portugal, aheruka gusinyira Ikipe ya Manchester City avuye muri Benfica Lisbon y’iwabo.
Manchester City yamutanzeho ama-Euro miliyoni 68.
3. Victor Osimhen
Ikipe ya Napoli yo mu Butaliyani yaguze uyu mukinnyi miliyoni 70 z’ama-Euro imuvana muri Lille yo mu Bufaransa.
Uyu rutahizamu afatwa nk’umwe mu bahazaza ba Afurika, akaba ari Umunya-Nigeria.
2. Arthur Melo
Umunya-Brésil, Arthur Melo muri iyi mpeshyi yavuye muri FC Barcelona yerekeza muri Juventus abisikanye na Miralem Pjanic.
Bivugwa ko Transfert y’uyu musore yari ifite agaciro ka miliyoni 72 z’ama-Euro.
1. Kai Havertz
Transfert ihiga izindi mu guhenda mu isoko ry’igura n’igurisha muri iyi mpeshyi ni iya Kai Havertz.
Uyu mudage ukina hagati mu kibuga, yavuye muri Bayer Leverkusen yo mu Budage yerekeza muri Chelsea yo mu Bwongereza, atanzweho miliyoni 80 z’ama-Euro.
