Ikipe ya Waasland Beveren ikinamo Umunyarwanda Bizimana Djihad, yamanutse mu cyiciro cya kabiri nyuma y’uko shampiyona y’ikiciro cya mbere mu Bubiligi yasojwe iyi kipe iri ku mwanya wa nyuma.
Ni shampiyona yasojwe habura umukino umwe ngo umwaka usanzwe urangire.
Ikipe ya Club Brugge yari iyoboye urutonde rwa shampiyona ni yo yahise ihabwa igikombe cya shampiyona, inahita ibona itike yo gukina imikino ya UEFA Champions league y’umwaka utaha.
Ni igikombe cya 17 iyi kipe yarushaga Gent ya Kabiri amanota 15 yegukanye, n’icya gatatu mu myaka itanu ishize. Club Brugge yemeje ko yatwaye igikombe cya shampiyona y’Ababiligi ibinyujije kuri Twitter yayo.
Djihad Bizimana na bagenzi be bari bafite amanota 20, n’umwenda w’ibitego 39.
U Bubiligi bubaye igihugu cya mbere ku mugabane w’u Bburayi gisoje shampiyona, nyuma y’uko yari yasubitswe muri Werurwe uyu mwaka kubera icyorezo cya Covid-19. Icyemezo cyo gusoza iyi shampiyona, cyafashwe ku bwumvikane bw’amakipe mbere yo kugishyira mu bikorwa kuri uyu wa gatanu.
