Ubushinjacyaha bw’u Bufaransa bwatangaje ko bwatangiye gukora iperereza ku Munyarwanda Aloys Ntiwiragabo ukekwaho uruhare muri Jenoside yakorewe Abatutsi, akaba n’umwe mu bashinzwe umutwe wa FDLR.
Ku itariki ya 23 Nyakanga ni bwo ikinyamakuru ‘Mediapart’ gikora inkuru zicukumbuye cyatangaje ko cyaguye gitumo Col. Aloys Ntiwiragabo, kikabasha kumugeraho aho yabaga mu nyubako iri mu gace ka Orleans.
Ishami rishinzwe kurwanya ibyaha by’iterabwoba mu bushinjacyaha bw’u Bufaransa kuri uyu wa Gatandatu ryatangaje ko nyuma y’iyi nkuru ya Mediapart, ryahise ritangira gukora iperereza kuri uyu mugabo w’imyaka 72 y’amavuko mu rwego rwo kwizera neza ukuri kw’iki kinyamakuru.
Col. Aloys Ntiwiragabo uregwa uruhare yagize muri Jenoside yakorewe Abatutsi mu 1994, akaba n’umwe mu bashinze umutwe w’inyeshyamba za FDLR yagaragaye aho yari yihishe mu Bufaransa nyuma y’amezi abiri hafatiwe Kabuga Felicien bivugwa ko uburyo yari yihishemo ari bumwe n’ubwo Ntiwiragabo yihishemo.
Ntiwiragabo yari yarashyiriweho impapuro zo kumuta muri yombi n’urukiko rwa ICTR mu 1998, nyuma zivanwaho, gusa ntawakekaga ko yaba ari mu Bufaransa kuko byavugwaga ko yaba yihishe muri kimwe mu bihugu by’Afurika, andi makuru akavuga ko ashobora kuba yarapfuye.
Ikinyamakuru Mediapart, kizwiho gukora inkuru zicukumbuye, nicyo cyabashije kuvumbura aho uyu mugabo yari yihishe nyuma y’iperereza ryitondewe ryafashe igihe cy’amezi arindwi kimusanga mu Mujyi uherere mu majyaruguru ashyira hagati mu Bufaransa.
Aloys Ntiwiragabo, wari yihishe mu nkengero za Orleans, ntabwo yagize gusa uruhare mu Jenoside yakorewe Abatutsi mu myaka 26 ishize, ahubwo yagize n’uruhare runini mu ishingwa ry’umutwe wa FDLR afatanyije na Hyacinthe Rafiki.
Iki kinyamakuru cyo mu Bufaransa kiravuga ko uyu mugabo wahoze ari intasi y’u Rwanda ndetse akaba n’umwe mu bateguye Jenoside yakorewe Abatutsi atari hafi gutabwa muri yombi kubera ko ubutabera mpuzamahanga bwahagaritse ibirego bye.
Igendeye kuri raporo z’amashyirahamwe y’Abanyarwanda yashingiwe mu Bufaransa imwe ku yindi, Mediapart yabanje kuvumbura umugore we, Catherine Nikuze, bivugwa ko yakandagije ikirenge mu Bufaransa bwa mbere , ku itariki 3 Werurwe 1998 agahabwa ubuhungiro ku itariki 22 Nzeri 1999.
Umwaka wakurikiye, bivugwa ko umugore we n’abana be babiri bimukiye mu nkengero z’umujyi wa Orleans, aho yahise atangirira kwinjira mu bikorwa by’ubuhezanguni mu buhungiro.
Catherine Nikuze yaje guhabwa ubwenegihugu mu 2005 afata izina rya Tibot.
Nkuko byerekanwe, hanze yinyubako ya HLM mu nkengero za Orleans aho Ntiwiragabo yahungiye, izina rya Tibot gusa niryo rigaragara kuri interineti. Ariko mu gasanduku k’amabaruwa y’abashakanye muri lobby, hagaragara amazina atatu: Nikuze, Tibot na Ntiwiragabo.
Ntiwiragabo yari mu mutwe w’abahezanguni kandi yategekaga abajandarume ba Kigali kugeza mu 1993. Yari umwe mu bagize urwego rw’imbere rw’ubutegetsi bakunze kwita “Akazu” kateguye Jenoside yakorewe Abatutsi mu 1994.
Mu 1993, Ntiwiragabo yari umuyobozi w’ubutasi bwa gisirikare (G2) n’umuyobozi mukuru wungirije w’Ingabo z’u Rwanda, Ex-FAR.
Muri jenoside, Ntiwiragabo, mu bindi, ngo yaba yaritabiriye inama zateguraga jenoside za buri munsi z’abakozi b’Igisirikare cy’u Rwanda icyo gihe.
Bivugwa kandi ko yahaye Interahamwe sitasiyo ya polisi i Kigali zikayikoresha mu iyicarubozo, gufata ku ngufu no kwica Abatutsi.
Muri Nyakanga 1994, ubwo Guverinoma yakoze jenoside yahungiraga mu cyari Zaire, Ntiwiragabo yari kumwe na yo, bigeze mu 1996 yimukira muri Kenya.
Bivugwa ko nyuma yagiye mu buhungiro muri Sudani kugeza ubwo yabashije kwinjira mu Bufaransa nyuma y’igihe, ariko iperereza rya Mediapart ntiryabashije kumenya igihe yahinjiriye.
