Leta y’u Burundi yahaye ikaze abifuza kuba indorerezi mu matora y’umukuru w’igihugu ateganyijwe mu minsi iri imbere muri iki gihugu, gusa bagomba kubahiriza ibwiriza ry’uko izo ndorerezi zigomba kubanza gushyirwa mu kato k’iminsi 14 nk’imwe mu ngamba zo kwirinda ikwirakwira rya Covid-19.
Amatora y’ugomba gusimbura Perezida Pierre Nkurunziza umaze imyaka 15 ayobora u Burundi ateganyijwe ku wa 20 Gicurasi. Mu rwego rwo kugira ngo aya matora azabe mu mucyo, ku wa 06 Mata 2020 ubunyamabanga bw’umuryango wa Afurika y’Iburasirazuba (EAC), bwandikiye Guverinoma y’u Burundi buyisaba kwemera ko EAC yohereza mu Burundi indorerezi z’amatora. Mu ibaruwa Minisitiri muri Perezidansi y’u Burundi ushinzwe umuryango wa Afurika y’Iburasirazuba, Mme Isabelle Ndahayo yandikiye Liberat Mfumukeko usanzwe ari umunyamabanga mukuru wa EAC, yamubwiye ko indorerezi z’amatora EAC ishaka kohereza zigomba kubanza kujya mu kato k’iminsi 14 mbere yo kujya kugenzura amatora. Minisitiri Ndahayo yagize ati” Ni itegeko ku bantu bose, baba Abarundi, abatuye mu Burundi cyangwa abenegihugu ba EAC binjira mu Burundi, kubahiriza akato k’iminsi 14.” Ndahayo yashimangiye ko indorerezi z’amatora za EAC zigomba “kubahiriza amabwiriza yashyizweho mu rwego rwo kwirinda ikwirakwira ry’icyorezo cya Covid-19.” Leta y’u Burundi kandi yagiriye inama ubunyamabanga bwa EAC ko bugomba kwiyambaza abantu bo mu bihugu binyamuryango bamaze kugera mu Burundi, hanyuma bakaba batarebwa n’akato k’iminsi 14 kugira ngo abe ari bo bazakora nk’indorerezi mu matora y’umukuru w’igihugu. Mu gihe amatora mu Burundi abura iminsi 10 ngo abe, bisobanuye ko nta ndorerezi zo mu bihugu by’amahanga zizayagaragaramo, kuko aboherezwa bazava mu kato amatora yararangiye. Mangingo aya mu Burundi harabarurwa abantu 15 banduye Covid-19 n’umwe yahitanye, gusa ibyo ntibyabujije ibihumbi by’Abarundi guteranira mu makomini atandukanye y’iki gihugu bumva imigabo n’imigambi y’abiyamamariza kuyobora iki gihugu.
