Ubushakashatsi bwakozwe na Kaminuza ya Oxford yo mu Bwongereza bwashyize u Rwanda mu bihugu 10 bya mbere ku isi bitarimo ibyago byo kwiyongera kw’icyorezo cya Covid-19 ku buryo byo byemerewe no koroshya ingamba zimwe na zimwe zirimo na gahunda ya Guma mu Rugo.
Uru rutonde ruriho ibihugu 195 byakoreweho ubushakashatsi hagendewe ku mabwiriza mpuzamahanga yo kurwanya iki cyorezo (OxCGRT), atangwa n’Ishami ry’Umuryango w’Abibumbye ryita ku buzima.
Amwe mu mabwiriza ya OMS yagendeweho ni umubare w’ibipimo bimaze gufatwa mu gihugu n’umubare w’ubwandu bwa Covid-19 bwabonetsemo, uburyo hashakishwa abantu bose bahuye n’abanduye bakaboneka, uburyo igihugu gicunga abavuye mu mahanga baranduye kugira ngo batanduza abandi n’uburyo inzego z’ubuzima zita ku banduye ndetse no kuba gifite ahagenewe abashyirwa mu kato hahagije.
Ibihugu 10 biri ku mwanya wa mbere kuri uru rutonde rwakozwe muri Gicurasi 2020, biri ku rwego rwo kwemererwa koroshya ingamba zo gukumira Coronavirus ni Nouvele Zealande, Greenland, u Rwanda, Taiwan, Chipure, Hong Kong, Seychelles, Repubulika ya Slovakia, Trinidad and Tobago na Vietnam.
Ni mugihe ibiguhu biza ku mwanya wa nyuma ari u Bwongereza, Sudani y’Epfo, Algeria, Nicaragwa, Iran ikaba ariyo ya nyuma kuri uru rutonde.
Kuva icyorezo cya Covid-19 cyagera mu Rwanda, Guverinoma yashyizeho ingamba zikomeye zo kwirinda zirimo guhana intera hagati y’abantu, kwambara agapfukamunwa, gukaraba kenshi no gukoresha imiti yica udukoko n’izindi.
Inzego z’Ubuzima kandi zikora amasaha 24/24 zita ku banduye no gushakisha abahuye nabo bagashyirwa mu kato ahantu habugenewe bakitabwaho.
Kugeza ubu zimwe mu ngamba zarorohejwe usibye mu karere ka Rusizi kakigaragaramo ubwandu bwinshi kimwe na Rubavu iri mu byago byo gukwirakwiramo ubwandu, ikaba igifungiwe ingendo.
