Ubushakasahtsi bwakozwe n’ikigo Germany Veterinary University cyo mu Budage, bwemeje ko imbwa ifite ubushobozi bwo gutandukanya umuntu urwaye covid-19 n’utayirwaye ku kigero cya 94 % binyuze mu kumva impumuro y’amacandwe .
Ubu bushakashatsi bwakozwe na university of Veterinary Medecine Hannover ku bufatanye na German Armed Forces buvuga ko imbwa imaze igihe kigera ku cyumweru ibitozwa iba ifite ubushobozi bwo guhumurirwa no gutandukanya amacandwe y’umuntu urwaye covid-19 n’utayirwaye ku kigero cya 94%.
Mu bushakashatsi bwabo bafashe imbwa 8, bamara icyumweru bazereka amacandwe y’abantu 1,012 batandukanye (abanduye Covid-19 n’abatayifite). Mu gihe cy’icyumweru kimwe gusa ngo za mbwa uko ari 8 zagendaga zitandukanya ya macandwe bazeretse hakurikijwe impumuro zayumvanye, bapima bagasanga zayatandukanyije neza, abarwaye Covid-19 bari ukabo n’abazima bari ukwabo.
Mu macandwe y’abantu 1012 bapimwe izi mbwa zayatandukanije neza ku kigero cya 94%. Aho 792 basanze ari bazima naho 157 basanganwa Covid-19, mu gihe 60 ari bo zibeshyeho gusa.
Ubusanzwe imbwa zigira imitsi myinshi yo mu bwonko izifasha kumva impumuro ku buryo budasanzwe. Ikigo Virginia Commonwealth Animals Hospital kivuga ko imbwa ifite bene utu dutsi duto turenga miliyoni 100 mu bwonko bwayo, mu gihe umuntu we agira bene n’utwo dutsi miliyoni 6 gusa. Ibi biha imbwa ububasha bwo guhumurirwa inshuro ziri hagati ya 1,000 kugeza ku 10,000 kurusha umuntu.
Maren von Koeckritz-Blickwede uhagarariye impuguke zakoze ubu bushakashatsi avuga ko nyuma yo kubona ubushobozi ntashidikanwaho bw’imbwa ishobora kumenya uwanduye covid-19 n’utarandura, bagiye kwiga ku kureba n’iba imbwa zihobora gutandukanya umurwayi wa covid 19 n’izindi ndwara.
Yagize ati: “Tugiye gushyira imbaraga mu bushakashatsi bwafasha kureba ko imbwa yatandukanya umuntu wanduye covid-19 n’urwaye izindi ndwara nka malariya umusonga usanzwe n’izindi “
Aba bashakashatsi bavuga ko ubu bushakashatsi bwabo bushobora kuzafasha cyane mu gupima covid-19 ahantu hahurirwa na benshi nko ku ma sitade, ibibuga by’indege, insengero n’ahandi henshi hashobora guhurira umubare w’abantu benshi.
.
