Imibare yashyizwe ahagaragara yerekana ko abakozi bo mu nzego z’ubuzima n’abapadiri ari bo baza ku isonga mu kwandura no guhitanwa n’icyorezo cya Virusi ya Corona. Iyi mibare igaragaza ko Abataliyani 23 bo mu nzego z’ubuzima ari bo bamaze kwicwa na Coronavirus, bigasobanura ko byibura mu bantu 10 bandura kiriya cyorezo, baba barimo umuganga cyangwa undi ufite aho ahurira no kwita ku barwayi. Mangingo aya mu Butaliyani harabarurwa abantu barenga 60,000 bamaze kwandura icyorezo cya Virusi ya Corona. Harabarurwa kandi abarenga 6,000 bamaze guhitanwa na cyo, barimo abapadiri barenga 60 bishwe na cyo nyuma y’uko Papa Francis abasabye kuba hafi y’abarwayi mu rwego rwo kubahumuriza. Impamvu abaganga bakunda kwandura COVID-19 Kuba abaganga bamara amasaha menshi bita ku barwayi ba Virusi ya Corona, ni impamvu yashyizwe imbere mu zituma bagira ibyago byinshi byo kwandura Coronavirus. Hiyongeraho n’ikibazo cy’ibikoresho nk’udupfukamunwa bikomeje kuba ingumi hirya no hino ku Isi, cyane mu gihugu cy’Ubwongereza. Cyakora cyo n’ubwo abaganga bandura cyane kiriya cyorezo, si benshi gihitana nk’uko bigendekera abapadiri. Urugero nko mu Bushinwa, icyorezo cya Virusi ya Corona cyanduwe n’abasaga 80,000; kica abagera kuri 3,300 barimo abaganga 13 mu babarirwa muri 3,300 bari bacyanduye. Inzobere zigaragaza ko impamvu Icyongereza cya Coronavirus kitazahaza abaganga cyane, ari uko abenshi muri bo baba bari hagati y’imyaka 20 na 40. Ku bapadiri biratandukanye Dailymail ivuga ko umubare munini w’abapadiri barenga 60 bishwe na Coronavirus mu Butaliyani, bari barengeje imyaka 70 y’amavuko. Ibi bishimangira buryo iki cyorezo kizahaza abantu bakuze, n’abandi bafite intege nke z’umubiri zishobora guterwa n’ubundi burwayi. Nko muri bariya bapadiri, imibare igaragaza ko umuto muri bo yari afite imyaka 45, mu gihe uwari ukuze kubarusha ari ufite imyaka 104. Muri rusange abamaze kwandura Coronavirus ku Isi bararenga 390,000, mu gihe abo imaze kwica barenga 17,000.
