Ikipe y'igihugu 'Amavubi' yatsinze Liberia ibitego 3-1, igenerwa ubutumwa na Perezida Paul Kagame mbere yo guhurira na Cap-Vert mu wundi mukino w'ijonjora ryo gushaka itike y'Igikombe cya Afurika.
Ku wa Gatanu, tariki ya 25 Nzeri 2026 ni bwo Amavubi y'u Rwanda yatsinze Liberia, mu mukino warebwe n'Umukuru w'Igihugu.
Nyuma y'uyu mukino, Perezida Paul Kagame yageneye abakinnyi b'ikipe y'Igihugu ubutumwa biciye muri Minisitiri wa Siporo, Nelly Mukazayire.
Muri ubwo butumwa, Minisitiri Mukazayire yababwiye ko Perezida Kagame abashimira ku bw'ubwitange bagaragaje, ibyatumye batangira neza.
Ati: "Dutewe ishema namwe, dutewe ishema n’akazi mwakoze kuko harimo ubushake, kwitanga no gukotana, kandi ibyo bigaragazwa n’umusaruro mwatanze.”
Yakomeje agira ati “Iyi ni intangiriro. Twizeye ko mwabonye aho kongera imbaraga. Umutoza n’ikipe yose mwakoze neza. Yaba abari mu kibuga ndetse n’abari hanze yacyo, twabonaga ko bose bari kubashyigikira.”
Minisitiri wa Siporo yaboneyeho gusaba abakinnyi gukomeza kugira icyerekezo no gutuza, anabibutsa ko bafite ubushobozi bwo guhangana n’amakipe akomeye.
Ati: "Mugire intumbero kandi mutuze. Ubu ni bumwe mu butumwa nahawe ngo mbagezeho. Mufite impano ndetse n’ubushobozi mu buryo mukina. Ubundi butumwa nahawe ni uko twese tubari inyuma, yaba ubuyobozi ndetse n’abafana.”
Yongeyeho ati “Cap-Vert ni ikipe ikomeye, ariko muhatane na bo, mushyiremo imbaraga, muzanabatsinda.”
Nyuma y’umunsi wa mbere w’imikino yo mu Itsinda K, u Rwanda na Mali ni byo biyoboye iri tsinda n’amanota atatu kuri buri kipe, ndetse buri imwe ikaba izigamye ibitego bibiri.
Nyuma yo gutsinda Liberia Amavubi yahise yerekeza i Praia muri Cap-Vert, mbere yo gukina n'ikipe y'iki gihugu ku wa Kabiri tariki ya 29 Nzeri 2026.