Umunya-Argentine, Lionel Messi, amaze gutsinda mu marushanwa yo ku mugabane w’u Burayi ibitego 118 mu minota 12,040 yakinnye, bikamushyira ku mwanya wa kabiri mu batsinze ibitego byinshi mu mateka, inyuma ya Cristiano Ronaldo umurusha ibitego 15.
Muri UEFA Champions league honyine Messi amaze gutsindamo ibitego 115, bikumvikanisha buryo ki hari amakipe menshi yagiye amugorerwaho.
Urubuga rwa UEFA rwerekana ko Messi amaze guhura n’amakipe 42 yo mu bihugu 16 muri UEFA Champions league, 37 muri yo akaba yarashoboye kuyatsinda igitego, mu gihe amakipe atanu yonyine ari yo ashobora kwikomanga ku gatuza kubera ko nta gitego arinjizwa n’uriya munya-Argentine.
Ayo makipe nta yandi atari Atlético Madrid yo muri Espagne, Benfica yo muri Portugal, Internazionale Milano (Inter Milan) yo mu Butaliyani, Rubin Kazan yo mu Burusiya na Udinese yo mu Butaliyani.
Hagati ya 2014 na 2016 ni bwo Messi yahuriye na Atletico Madrid muri 1/4 cy’irangiza cya UEFA Champions league, gusa mu mikino ine yakinnye na yo nta gitego na kimwe yabashije gutsinda mu izamu ryayo.
Atletico Madrid ifite agahigo ko kuba ari yo imaze iminota myinshi (360) itaratsindwa na Messi igitego muri UEFA Champions league, ikaba igasangiye na Inter Milan yahuye na we incuro enye.
Benfica yo muri Portugal yo yahuye na Messi incuro ebyiri muri UEFA Champions league ya 2012, gusa haba mu mukino ubanza n’uwo kwishyura nta gitego yigeze itsindwa na we.
Ni na ko bimeze ku kipe ya Udinese yari mu tsinda rimwe na FC Barcelona muri UEFA Champions league ya 2005/06.
Umukino ubanza iyi kipe yahuye na Messi Ronaldinho yawutsinzemo ibitego bitatu wenyine, uwo kwishyura Messi ntiyawukinnye dore ko yari yicaye ku ntebe y’abasimbura.
Hagati ya 2009 na 2011 FC Barcelona bwo yari mu itsinda rimwe na Rubin Kazan yo mu Burusiya, gusa incuro enye zose bahuye nta n’imwe Messi yigeze atsindamo igitego.
Muri izo ncuro by’umwihariko ikipe ya Kazan yagoye cyane FC Barcelona, dore yayitsinze umukino umwe, itsindwa undi banganya ibiri.
Ikitazwi ni ukumenya niba ariya makipe azakomeza kwihagararaho, dore ko na Chelsea yatsinzwe na Messi igitego nyuma y’iminota 730 atazi uko kwinjiza igitego mu izamu ryayo bimera.
