Impuzamashyirahamwe y’Umupira w’Amaguru i Burayi (UEFA) yatangaje ko ikipe ya MFK Karviná yo muri Repubulika ya Czech itazitabira amarushanwa y’i Burayi mu mwaka w’imikino wa 2026/2027, nyuma yo gusanga yaragize uruhare mu bikorwa byo kugena cyangwa kugira uruhare mu kugoreka ibiva mu mikino.
Iki cyemezo cyafashwe n’Urwego rwa UEFA rushinzwe kujurira ku wa 2 Nyakanga 2026, rushingiye ku ngingo ya 4.01(g) y’amategeko agenga kwemererwa kwitabira Europa League. Iyo ngingo isaba ko amakipe yitabira amarushanwa ya UEFA aba adafitanye isano n’ibikorwa byo gucura cyangwa kugena ibyavamo by’imikino.
MFK Karviná yari yabonye itike yo gukina Europa League nyuma yo kwegukana igikombe cy’imbere mu gihugu. Gusa, nyuma y’iki gihano, yahise ikurwa muri ayo marushanwa.
Nyuma yo gukurwamo kwa MFK Karviná, UEFA yahise ihindura uko amakipe yo muri Czech azitabira amarushanwa y’i Burayi:
Viktoria Plzeň yazamuwe ijya mu mikino ya kamarampaka (play-offs) ya Europa League.
Hradec Králové izakina icyiciro cya kabiri cy’amajonjora ya Europa League, aho izahura na Tromsø yo muri Noruveje.
FK Jablonec na yo yahise ibona umwanya mu cyiciro cya kabiri cy’amajonjora ya Conference League, aho izacakirana na NK Varaždin yo muri Croatia.
MFK Karviná ibaye ikipe ya kabiri UEFA ihannye muri uyu mwaka kubera ibibazo bifitanye isano no kugena ibyavamo by’imikino.
Mbere yayo, ikipe ya PFK Turan Tovuz yo muri Azerbaijan na yo yari yahagaritswe kwitabira Conference League, nyuma y’uko abakinnyi barindwi bayo bahamwe n’ibyaha byo gucura imikino, bagahanwa n’Ishyirahamwe ry’Umupira w’Amaguru muri Azerbaijan (AFFA).
Iyo kipe yatangaje ko izajuririra icyo cyemezo mu Urukiko Nkemurampaka rwa Siporo (CAS), ishaka ko gihindurwa.
