Polisi ya Uganda yatangaje ko kuri uyu wa Mbere yataye muri yombi abadepite babiri mu nteko ishinga amategeko y’iki gihugu bayoboye abaturage mu gukora imyigaragambyo itemewe n’amategeko.
Abatawe muri yombi ni depite Gilbert Olanya, uhagarariye agace ka Aruu mu nteko na mugenzi we Samuel Odonga Otto, uhagarariye Kilak, polisi n’igisirikare bikaba bibashinja gushishikariza no kuyobora imyigaragambyo itemewe mu rubyiruko n’abaturage nk’uko uhararariye igipolisi mu karere ka Gulu, Emmanuel Mafundo yabitangaje.
Abigaragambyaga bari bikwije imihanda yo mu Mujyi wa Gulu uherereye mu majyaruguru ya Uganda basaba Guverinoma gufunga umupaka wa Elegu kuko ariwo winjiriraho abashoferi b’amakamyo bakomeje gukwirakwiza icyorezo cya Coronavirus muri iki gihugu.
Polisi yatangaje aba banyepolitiki bafungiwe hamwe n’abandi bayobozi b’inzego z’ibanze batatu bari bafatanyije nabo kwigaragambya, bakaba bafungiwe kuri sitasiyo ya polisi ya Gulu mu gihe hagikorwa iperereza hashakishwa abandi bagize uruhare mu myigaragambyo no guhana abaturage bayigiyemo.
Uhagarariye igisirikare cya Uganda muri diviziyo ya 4, Maj Caesar Olwemy yabwiye Daily Monior ko aba bigaragambije bishe amabwiriza yo kwirinda icyorezo nko guhana intera, avuga ko uburyo bushoboka kabone n’iyo byasaba imbaraga buzifashishwa mu guhangana n’abantu bajya mu bikundi birimo nk’imyigaragambyo ntibahane intera.
Iyi myigaragambyo ibaye nyuma y’uko ku munsi w’ejo Minisiteri y’Ubuzima yatangaje ko abaganga barindwi barimo ba dogiteri babiri banduye Covid-19.
Abaturage bashyira mu majwi Guverinoma ya Uganda kuba idafata ingamba zihamye ngo ihagarike abashoferi binjirira ku mupaka wa Elegu uhuza iki gihugu na Sudani y’Epfo kuko ngo aribyo bikomeje gutuma abarwayi ba Covid-19 biyongera bakaba bageze kuri 457 uyu munsi, Uganda ikaba yaraciye ku Rwanda.
Ikindi Minisiteri y’Ubuzima ishinjwa ni ukutongerera ubushobozi ibitaro bivurirwamo abarwayi n’ibishyirwamo abari mu kato kuko byamaze ibyateganyijwe ngo byamaze kuzura.
