Uganda: Abakomando bafite intwaro ziremereye bamaze guta muri yombi Gen. Tumukunde

Abasirikare ndetse n’abapolisi bafite intwaro ziremereye bamaze guta muri yombi Rtd. Gen. Henry Tumukunde wabaye Minisitiri w’Umutekano wa Uganda, bamusanze ku biro bye biri muri Kololo, impamvu yabyo ikaba itaramenyekana.

Aya makuru tuyakesha umunyamakuru Andrew Mwenda uvuga ko mu mihanda ya Kololo aho Gen. Tumukunde afatiwe nta muntu cyangwa imodoka yemerewe kuhanyura, bose bahagaritswe.

Gen. Tumukunde abicishije ku rubuga rwe rwa Facebook mu minota mike ishize, yagize ati: “ Bavandimwe ubu nzengurutswe n’abasirikare bakuru ku biro byanjye bya Kololo” bukurikirana n’aho yavuze ati: “ Ubu maze gutabwa muri yombi.”

Gen. Tumukunde amaze iminsi agaragaza ko atakiri mu nzira imwe na Museveni

Uyu musirikare mukuru wigeze gukorana na Perezida Museveni bya hafi, aherutse gutangaza ko bazahatana mu matora y’Umukuru w’Igihugu azaba mu 2021.

Icyakurikiyeho ni uko yahise yamburwa abamurindaga mu rugo iwe gusa ntibyigeze bitangazwa niba hari aho bihuriye n’amatora.

Gen. Tumukunde aherutse kandi gutangaza uburyo ngo ‘yahenze ubwenge’ Perezida Museveni, ubwo yamubeshyaga ko Gen. Kale Kayihura wabaye umuyobozi wa Polisi y’Igihugu kugeza mu 2018, yakoranaga n’inzego z’umutekano z’u Rwanda, bigatuma akurwa kuri uyu mwanya, akanafungwa.

Ngo yabeshye Museveni kandi kugira ngo amukure ku mwanya wa Minisitiri w’Umutekano wa Uganda, bimukundira mu 2018 mu mpinduka zatumye we na Kale Kayihura bavanwa ku nshingano mu gihe kimwe.