Umukecuru w’imyaka 107 y’amavuko ukomoka mu gihugu cy’Ubuholandi, Cornelia Ras, yakize icyorezo cya Virusi ya Corona aba umuntu ukuze kurusha abandi ku Isi ushoboye gukira icyo cyorezo. Mukecuru Cornelia yafashwe na kiriya cyorezo ku wa 17 Werurwe, nyuma y’umunsi umwe yizihije isabukuru y’imyaka 107 y’amavuko. Ikinyamakuru AD cyo mu Buholandi, cyavuze ko Cornelia yafashwe na kiriya cyorezo ubwo yari avuye mu misa ari kumwe n’abandi bantu aturanye na bo ku kirwa cya Goeree-Overflak. We n’abandi bantu 40 barasuzumwe, basanga baranduye kiriya cyorezo. AD ivuga ko abantu 12 muri bariya 40 bishwe na Coronavirus, gusa Ras we akabwirwa n’abaganga ku wa mbere w’iki cyumweru ko yakize kiriya cyorezo. Maaike de Groot, umwisengeneza wa Ras, yavuze ko batari bazi ko azakira kiriya cyorezo. Yagize ati” Ntabwo twari twiteze ko azarokoka. Nta miti afata, aracyagenda neza kandi apfukama buri joro kugira ngo ashimire Uwiteka. Urebye, azashobora gukomeza kubikora.” Mbere ya Ras, umuntu ukuze kurusha abandi wari warokotse Coronavirus, ni Bill Lapschies, Umunyamerika w’imyaka 104 warokotse Intambara ya Kabiri y’Isi n’icyorezo cy’ibicurane bya Espagne (Spanish Flu). Lapschies wavukiye i Salem mu 1916, yari yerekanye bwa mbere ibimenyetso bya Coronavirus ku wa 05 Werurwe, ahita ashyirwa mu kato mu rugo rwe. Umukecuru wo mu Bushinwa witwa Zhang Guangfen w’imyaka 103, na we yakize Covid-19 nyuma yo kuvurwa iminsi itandatu i Wuhan. Muri Iran na ho umukecuru w’imyaka 103 utaravuzwe amazina na we yakize Coronavirus ikunze kwibasira abasheshe akanguhe, nyuma yo kuvurirwa mu bitaro mu mujyi wa Semnan.
