Umucuruzi ukomeye wo muri Zimbabwe, Wicknell Chivayo, n’umugore we Lucy Muteke, bapfiriye mu mpanuka ya kajugujugu yahitanye abantu batandatu.
Iyi mpanuka yabaye ku mugoroba wo ku wa Gatatu mu gace ka Marondera, hafi kilometero 70 mu burasirazuba bw’umurwa mukuru Harare. Polisi yatangaje ko abantu bose bari muri iyo kajugujugu, uko ari batandatu, bapfuye.
Umuvugizi w’umuryango wa Chivayo, Herbert Chivayo, yemeje urupfu rw’uyu mucuruzi n’umugore we, avuga ko umuryango wabo wababajwe bikomeye n’aya makuba.
Polisi yavuze ko iyo kajugujugu yakoze impanuka ahagana saa 17:00 ku isaha yo muri Zimbabwe. Abari bayirimo barimo abapilote babiri, gusa amazina y’abandi bantu bari kumwe na Chivayo ntiyahise atangazwa.
Amakuru yatangajwe na ZBC avuga ko Chivayo n’umugore we bari bavuye ahitwa Gandami muri Chikomba, aho bubakaga inzu yabo yo mu cyaro. Iyo kajugujugu yakoze impanuka ahitwa Kudenga Farm, nyuma y’iminota igera kuri 40 ihagurutse.
Kugeza ubu, icyateye iyo mpanuka ntikiramenyekana, kandi inzego zishinzwe umutekano zatangiye iperereza.
Chivayo yari umwe mu bacuruzi bazwi cyane muri Zimbabwe, akaba yaramenyekanye cyane kubera ubuzima bwe bw’akataraboneka, impano z’amafaranga n’imodoka yahaga ibyamamare, abayobozi b’amadini ndetse n’abandi bantu bazwi.
Yari kandi umuyobozi mukuru wa Intratrek Zimbabwe, ikigo cyagiye gihabwa amasezerano akomeye na Leta. Imwe mu mishinga yari izwi cyane ni umushinga w’ingufu z’imirasire y’izuba wari ufite agaciro ka miliyoni 172 z’amadolari ya Amerika.
Ubucuruzi bwe bwagiye bukurikiranwa n’inzego zitandukanye, ariko Chivayo yahakanye ibirego by’imikorere mibi byagiye bimushinjwa.
Mu 2025, komisiyo ishinzwe kurwanya ruswa muri Zimbabwe yafunze iperereza ku birego byari bifitanye isano n’amasezerano y’amatora yo mu 2023, ivuga ko itabonye ibimenyetso bihagije bihamya ko Chivayo cyangwa Komisiyo y’Amatora ya Zimbabwe bakoze amakosa.
Chivayo yari azwi kandi ku kuba yari afitanye umubano n’abayobozi bakomeye muri Afurika. Perezida wa Kenya, William Ruto, wamwitaga inshuti ye magara, yagaragaje akababaro nyuma y’urupfu rwe, anihanganisha imiryango y’abahitanywe n’iyi mpanuka.
Chivayo kandi yajyaga ashyira ku mbuga nkoranyambaga amafoto ari kumwe n’abayobozi batandukanye barimo Perezida wa Zambia Hakainde Hichilema, Perezida wa Afurika y’Epfo Cyril Ramaphosa, Perezida wa Tanzania Samia Suluhu Hassan, ndetse n’Umwami wa Eswatini Mswati III.
Kugeza ubu, iperereza ku cyateye impanuka rirakomeje.