Igihugu cya Nigeria binyuze muri Perezida wacyo, Muhammadu Buhari, cyakiriye ku muti wa Covid-Organics wakozwe na Madagascar yemeza ko uvura icyorezo cya Covid-19.
Perezida Buhari yakiriye uyu muti awushyikirijwe na mugenzi we wa Guinée Bissau, Umaro Sissoco Embaló. Iyi Guinée Bissau na yo iri mu bihugu byasabye Madagascar Covid-Organics ngo biyifashishe kuvura abaturage babyo Coronavirus.
BBC yavuze ko Buhari avuga ko umuti muke yafashe badahita bawuha Abanya Nigeria, ko ahubwo bagomba kubanza bawusuzuma.
Yatangaje ko “azabanza akumva ibivugwa n’abashinzwe igenzura ry’imiti mbere yo kwemera ko hari umuti mushya cyangwa uwa gakondo ukoreshwa”.
Muri Nigeria harabarurwa abantu 5,450 bamaze kwandura coronavirus, 171 yishe n’ababarirwa muri 1,320 bayikize.
Iki gihugu cyiyongereye ku bindi bihugu bya Afurika byamaze guhabwa uriya muti, birimo Guinea Bissau, ibirwa bya Comores, Niger, Tanzania na Liberia.
Cyakora cyo Ishami ry’umuryango w’abibumbye ntiriremeza ko uriya muti gakondo wa Madagascar uvura Covid-19, gusa rivuga ko riri gukorana na leta ya Madagascar mu gusuzuma neza niba koko uyu muti uvura iki cyorezo.
