Umutoza w’Ikipe y’Igihugu ya Repubulika Iharanira Demokarasi ya Congo (RD Congo) yashinjije ikipe ya Kenya, izwi nka Harambee Stars, ibikorwa byo gutata amakuru y’ikipe ye mbere y’umukino wa mbere wa African Nations Championship (CHAN) 2024.
Mu kiganiro n’abanyamakuru mbere y’uko iri rushanwa ritangira, uyu mutoza yavuze ko hari ibimenyetso bimwereka ko hari abantu bashyizweho n’abanya-Kenya bagamije gukusanya amakuru ajyanye n’imyitozo, abakinnyi n’uburyo ikipe ya DR Congo itegura umukino.
Ati: “Hari ibimenyetso by’uko amakuru yacu agenda asohoka uko atari, bikaba bikekwa ko hari ibikorwa byo gutata. Ibi bishobora kugira ingaruka ku mukino, kuko ubunyangamugayo mu marushanwa ni ingenzi.”
Nubwo ayo makuru ataremezwa n’impande zombi, aya magambo yateje impaka ku mbuga nkoranyambaga, bamwe basaba isuzuma ryimbitse, abandi bakabyita “guharabikana.”
Umukino wa mbere wa CHAN 2024 hagati ya RD Congo na Kenya uzaba ku munsi wa kabiri w’irushanwa, Ku cyumweru, tariki ya 3 Kanama 2025 saa munani muri Stade ya Moi International Sports Centre, Kasarani i Nairobi .
