Umwana wa myugariro wa Olympic Star yo mu Burundi, Emile Bob Balama yishwe n’abagizi ba nabi muri Congo.
Mu mpera z’icyumweru gishize nibwo mu Burundi hamenyekanye inkuru y’inshamugongo ko umwana wa Myugariro wa Olympic Star, Emile Bob Balama yishwe n’abagizi ba nabi.
Amakuru avuga ko uyu mwana yishwe ari kumwe na se ubwo bari bari mu gihugu cya Repubulika Iharanira Demokarasi ya Konngo.
Mu butumwa iyi kipe yanyujije ku mbuga zabo, yemeza ko uyu mwana yishwe n’abagizi ba nabi nyuma yo kwaka se amafaranga yo kumurekura.
Iyi kipe ikomeza itangaza ko Emile Bob Balama yasabwe gutanga amafaranga ibihumbi birindwi na magana atanu by’amadorari ya Amerika ($7,500) mbere y’uko umwana we yicwa.
Olympic Star kandi yifatanyije n’umuryango w’uyu mukinnyi wapfushije umwana.
Yagize ati: “Ikipe ya Olympic Star yifatanije na we (Emile Bob Balama) mu gihe cy’akababaro.”
Emile Bob Balama asanzwe ari myugariro wo ku ruhande wa Olympic Star yo mu Burundi, akaba yapfushije umwana w’umuhungu.
