Ikipe ya FC Barcelona kuri uyu wa kabiri, yemeje ko yamaze gutandukana n’Umufaransa Eric Abidal wari umaze imyaka ibiri ari Umuyobozi wa Siporo muri iriya kipe y’i Catalunya.
FC Barcelona yemeje ko yatandukanye n’uyu mugabo mu butumwa yanyujije ku rubuga rwayo rwa Internet.
Yagize iti: “Barcelona na Éric bageze ku bwumvikane bwo gusesa amasezerano impande zombi zari zihuriyeho. Ikipe ishimira Éric Abidal mu ruhame ku bw’ubunyamwuga, umurava ubwitange ndetse n’umubano we wa hafi yagiranye n’impande zose z’Umuryango wa Braugrana.”
Eric Abidal yatandukanye na FC Barcelona nyuma y’umunsi umwe iyi kipe itangaje ko yatandukanye burundu na Quique Setién wari umutoza wayo mukuru.
Intandaro yo kugira ngo aba bagabo babe bakomeje kwirukanwa ni igisebo gikomeye FC Barcelona yagize mu cyumweru gishize, ubwo yanyagirwaga na Bayern Munich ibitego 8-2, mu mukino wa 1/4 cy’irangiza cya UEFA Champions league.
Ni umukino wasize ubuyobozi bwa FC Barcelona butangaje ko muri iyo kipe hagomba kubamo impinduka zikomeye cyane, bikaba byitezwe ko zigomba no gukomereza mu bakinnyi.
Magingo aya amazina akomeye muri iyi kipe akomeje kugarukwaho mu bitangazamakuru bitandukanye ni Luis Suarez, Jordi Alba, Sergio Busquets, Ivan Rakitic na Artulo Vidal, mu gihe abakinnyi nka Gerard Pique na Samuel Umtiti na bo bari mu bashobora kurekurwa na Barça.
