Igisirikare cya Uganda (UPDF) na FARDC cya Repubulika Iharanira Demokarasi ya Congo, batangije icyiciro cya kabiri cy’ibitero biremereye ku birindiro by’umutwe wa ADF hifashishije indege n’ibimodoka by’intambara.
Ibirindiro bya ADF byibasiwe n’ibi bitero ni ibiherereye mu ntara za Ituri na Kivu y’Amajyaruguru.
Intego y’ibi bitero ngo ni ikurandura burundu uriya mutwe wakunze kwifashisha amashyamba ya Congo Kinshasa mu gukorera ibikorwa by’iterabwoba ku butaka bwa Uganda no mu gice cy’Uburasirazuba bwa Congo Kinshasa.
Umusirikare wa FARDC wahaye ikinyamakuru The Kampala Post amakuru yavuze ko “mu rukerera [rwo kuri uyu wa Kabiri] twatangije icyiciro cya kabiri cya Operation Shujaa turasa ku bindi birindiro bya ADF muri Ituri na Kivu y’Amajyaruguru.”
Mu cyiciro cya mbere cy’ibi bitero cyatangiye ku itariki ya 30 Ugushyingo 2021, Ingabo za Uganda n’iza Congo Kinshasa zivuga ko zashenye ibirindiro byinshi bya ADF ndetse zinafata igace ka Kambi Ya Yua kafatwaga nk’Icyicaro Gikuru cy’uriya mutwe.
Ingabo z’ibihugu byombi mu minsi ishize ubwo zagenzuraga aka kace zatangaje ko zabonye icyobo rusange gihambyemo abarwanyi babarirwa mu magana, zikavuga ko ari abahitanwe n’ibitero byazo.
UPDF na FARDC kandi bavuga ko mu cyiciro cya mbere cya Operation Shujaa abari abarwanyi ba ADF babarirwa muri 60 bahisemo kuyamanika.
Hagati aho n’ubwo Ingabo z’ibihugu byombi zivuga ko zashegeshe uriya mutwe mu buryo bugaragara, mu minsi yashize hagiye humvikana abasivile batari bake bagiye bicwa nyuma yo kugabwaho ibitero n’abarwanyi bawo.
Ni nyuma yo gushinga ibirindiro bishya mu rugabano rw’Intara ya Kivu y’Amajyaruguru na Ituri.
