Urukiko rwa Gisirikare rwa Uvira muri iki cyumweru rwatangije urubanza rw’abantu 12 barimo abasirikare icyenda, umupolisi umwe, n’abawazalendo babiri, barimo uwiyise jenerali, ku byaha bitandukanye byakozwe hagati ya Luvungi na Uvira mu Ntara ya Kivu y’Amajyepfo.
Nk’uko byatangajwe na Lieutenant Reagan Mbuyi Kalonji, Umuvugizi w’ibikorwa bya Sukola 2 muri Kivu y’Amajyepfo, ngo uru rubanza rurimo imanza umunani, hagati y’ubushinjacyaha, buhagarariwe n’Umucamanza wa Lt. Col. Lwamba Songe, n’abo basirikare, umupolisi, n’inyeshyamba ebyiri za Wazalendo, zirimo uwihaye ipeti rya jenerali.
Ati: “Mu baregwa 12 harimo abasirikare 9 ba FARDC, 5 muri bo bakurikiranyweho icyaha cyo kwiba ibintu bya gisirikare mu kigo cy’ibikoresho cy’Akarere ka 33 ka gisirikare, abandi basirikare 4 ndetse n’umupolisi umwe bakurikiranyweho gutakaza intwaro, kurenga ku mabwiriza no gukwirakwiza amasasu y’intambara ndetse n’abanyamuryango 2 b’ingabo zishinzwe kwirwanaho za Wazalendo, barimo Papy Osea, ukurikiranweho icyaha cyo kwica mugenzi we Miriam Byayesu i Luvungi, n’undi wiyise jenerali, umuyobozi w’agatsiko witwa Kanani Kabeya Kyuhu, ukurikiranweho icyaha cyo kwica Major Salumu Tambwe, umusirikare mukuru muri FARDC, uherutse guhotorwa ku itariki ya 4 Mata 2025, ubwo yari ku kazi muri SANGE, “.
Iburanisha ribera mu cyumba cy’urukiko rwa gisirikare rwa Uvira Garrison nyuma y’amezi atanu ibikorwa by’inkiko bisubitswe muri uyu mujyi. Urubanza ruyobowe na perezida warwo, Major Mwanza Kanyimbu Jean-Marie, wungirijwe n’abacamanza bane, bose bakaba ari ba ofisiye bato.
Ku munsi wa mbere w’iburanisha, usibye kumenya umwirondoro w’abaregwa, abasirikare babiri barokotse ba FARDC na bo bumviswe, umwe nk’umutangabuhamya w’ibyabaye.
Ni rwo rubanza rwa mbere rubereye mu Mujyi wa Uvira, ubu wahindutse umurwa mukuru w’Intara ya Kivu y’Amajyepfo nyuma y’uko Inyeshyamba za AFC/M23 zigaruriye Umujyi wa Bukavu.
