Leta ya Bangladesh yishe inyonze uwitwa Abdul Majed, nyuma yo kugira uruhare mu iyicwa rya Sheikh Mujibur Rahman wabaye Perezida wa mbere w’iki gihugu ryabaye mu myaka 45 ishize.
Abdul Majed wahoze ari Captain mu ngabo za Bangladesh, mu ijoro rishyira icyumweru cya Pasika yishwe amanitswe kuri gereza iri ahitwa Keraninganj, mu murwa mukuru wa Bangladesh, Dhaka; nk’uko byemejwe na Brig. Gen. AKM Mustafa Kamal Pasha uyobora amagereza yo muri Bangladesh.
Ku wa kabiri w’iki cyumweru ni bwo Majed yari yatawe muri yombi, nk’uko byemejwe na saduzzaman Khan, Minisitiri w’umutekano w’imbere mu gihugu. Minisitiri Khan yavuze ko itabwa muri yombi rya Majed ari ‘impano ikomeye’ kuri Bangladesh muri uyu mwaka wa 2020 nk’uko byatangajwe na Al Jazeera dukesha iyi nkuru.
Kwica Majed byatwaye imyaka 45 kuva yica Perezida wa Bangladesh, kubera ko yari amaze imyaka myinshi yihishe mu Buhinde, nyuma yo gutangaza ku mugaragaro ko yagize uruhare mu iyicwa ry’uriya mubyeyi wa Bangladesh.
Abdul Majed yishwe nyuma y’uko Perezida wa Bangladesh M Abdul Hamid atesheje agaciro imbabazi yari yasabye.
Ni nyuma y’uko muri 2009 yari yakatiwe urwo gupfa n’urukiko rw’ikirenga rwa Bangladesh ari kumwe n’abandi bafatanyije.
Sheikh Mujibur Rahman yicanwe n’umuryango we muri Kanama mu 1975, bikozwe na bamwe mu bari abasirikare ba Bangladesh. Uretse kuba yarabaye Perezida wa mbere w’iki gihugu, yanabaye Minisitiri w’Intebe wacyo kugeza mu 1971, ibituma abaturage ba kiriya gihugu bamufata nk’umubyeyi wacyo.
