Abarwanyi batanu b’inyeshyamba za FLN/CNRD bafatiwe muri Teritwari ya Walungu muri Kivu y’Amajyepfo mu rugendo rwerekeza mu Rwanda aho bari bagambiriye guhungabanya umutekano. Umuvugizi wa Operasiyo Zokola, Captain Dieudonné Kasereka yabwiye Rwandatribune dukesha iyi nkuru ko aba barwanyi barimo n’umwe mukuru bafashwe n’Ingabo za Congo (FARDC) mu ijoro ryo kuwa 24 rishyira 25 Ukwakira 2019. Capt. Kasereka, Umuvugizi w’ibikorwa bya Gisirikare byo guhashya imitwe irimo FDLR byiswe Sukola II, yavuze ko abo barwanyi bafashwe bafite ibikoresho bya gisirikare n’amasasu menshi. Yagize ati “Ibikorwa byo kubafata byakorewe i Bukavu no hafi yaho. Kuri uwo munsi abarwanyi batanu barafashwe, imbunda esheshatu zo mu bwoko bwa AK47 n’imbunda nto, amasasu 500 n’ibindi bikoresho birimo imyambaro ituma aba babona bagira ngo ni ingabo za Leta.” Yakomeje avuga ko “Bane bafashwe ku wa Kane tariki 24 Ukwakira 2019. Aba barwanyi bakora ibikorwa by’iterabwoba mu Rwanda n’ubujura bwitwaje intwaro ku butaka bwa RDC.” Capt Kasereka yavuze ko umurwanyi wa gatanu utatangajwe amazina ari na we muyobozi ukomeye muri uyu mutwe yafashwe mu byumweru bitatu bishize. Komanda w’Ingabo zo mu Karere ka 33, Maj. Gen. Akili Muhindo Charles yasabye abaturage ba Kivu y’Amajyepfo n’aba Minema mu gutanga amakuru y’abantu bose bo muri iyi mitwe aho bihishe hose. Ibi bibaye mu gihe abandi bantu 4 bakekwaho kugira uruhare mu bikorwa bimaze iminsi bihungabanya umutekano mu Karere ka Rusizi, birimo na grenade yatewe mu Mujyi wa Rusizi mu mpera z’icyumweru gushize beretswe abatuye aka karere. Aba bose uko ari 4 bemereye imbere y’abaturage kugira uruhare muri ibyo bikorwa ndetse bakaba bavuga ko bari barinjiye mu mitwe FLN na MRCD. Bavuga ko binjijwe ba bamwe mu bakorera iyi mitwe babarizwa i Bukavu ho muri Repubulika Iharanira Demokarasi ya Kongo aho ngo bizezwaga kuvanwa mu bukene. Bavuga ko bari barijejwe kujya bahabwa amafaranga ku gikorwa gihungabanya umutekano bakoze. Ni nde uyoboye ibikorwa byo guhungabanya umutekano mu Rwanda? Iyi nkuru ikomeza ivuga ko abagiye batanga ubuhamya bavuga ko ibi bikorwa byose byo muri FLN/CNRD biyobowe na Brig. Gen.Hakizimana Antoine alias Jeva ,uvuka mu cyahoze ari Komini Karambo Perefegitura ya Cyangugu, ubu akaba ari mu Karere ka Nyamasheke,Umurenge wa Kanjogo,Akagali ka Kigarama. Uyu ngo yahunze muri 1994 ari umunyeshuri muri Kaminuza y’uRwanda i Butare yinjiye muri ALIR ahitwa i Tingi Tingi muri 1996 muri 1998 yoherejwe na FDLR kwiga muri Kaminuza ya Lubumbashi mu Ishami ry’imibare. CNRD UBWIYUNGE yiyomoye kuri FDLR muri 2016,ishingwa na Lt.Gen Ndagijimana Laurent uzwi ku mazina ya Wilson Irategeka,wavukiye mu Karere ka Muhanga muri Nyakabanda,yahunze ari mu gisilikare cya EX FAR muri 1994 yari afite ipeti rya S/Liyetona. Ishami rya gisilikare cya CNRD UBWIYUNGE cyahawe izina rya FLN gikuriwe na Gen.Maj Hamada alias Muramba CNRD UBWIYUNGE aho imaze kwinjira mu ihuriro rya MRCD FLN yinjijwe muri iryo Huriro.
Ubwo CNRD UBWIYUNGE yashingwaga yari afite ipeti rya Liyetona Koroneri ,muri iki gihe akaba ariwe Ushinzwe ibikorwa bya Gisilikare muri FLN.
2 Responses
Abandi barwanyi batanu ba FLN/CNRD bafashwe baje guhungabanya umutekano mu Rwanda
Ndabonabona rwose FARDC na kisetkedi bakomeje kwitwara neza
Abandi barwanyi batanu ba FLN/CNRD bafashwe baje guhungabanya umutekano mu Rwanda
Ndabonabona rwose FARDC na kisetkedi bakomeje kwitwara neza