Uganda: Polisi yongeye gutobora amapine y’imodoka ya Bobi Wine (Amafoto)

Robert Ssentamu Kyagukanyi Alias Bobi Wine uri mu bakandida biyamamariza kuyobora Uganda, aravuga ko Abapolisi ba kiriya gihugu barashe imodoka ye bakayitobora amapine.

Imodoka ya Bobi Wine yashwe ubwo yerekezaga ahitwa Rwampara nk’uko yabingaje abinyujije ku rubuga rwe rwa Twitter.

Ati: “Kare turi mu nzira twerekeza Rwamara, abantu bari bahishe amasura bambaye imyambaro y’umukara ya Polisi badukurikirana mu bikorwa byose byacu byo kwiyamamaza, bafunze umuhanda hanyuma bongera kurasa ku modoka yacu bayitobora abapine y’imbere. Kudutera ubwoba ntibizaduca intege mu guharanira impinduka.”

Amafoto yafashwe n’ikinyamakuru Daily Monitor yerekana iriya modoka ya Kyagukanyi yatobotse amapine abiri y’imbere.

Ni ku ncuro ya kabiri muri uku kwezi k’Ukuboza imodoka ya Bobi Wine iraswa amapine.

Ku wa 01 Ukuboza ubwo uyu muhanzi wahindutse umunya-Politiki yari ageze ahitwa Kayunga yerekeza mu gace ka Jinja, na bwo yashyamiranye na Polisi biba ngombwa ko irasa amapine y’imodoka ye.

Polisi ya Uganda ntabwo iratangaza impamvu yongeye kurasa imodoka ya Bobi Wine ukunze gushyamirana na yo, gusa yakunze kumushinja kurenga ku mabwiriza ya Komisiyo y’amatora no gushaka guteza akaduruvayo.